Starton edicioni i 10-të i Maratonës së Tiranës: Rreth 5,800 vrapues në garë, masat dhe akset që bllokohen deri në orën 16:00

Kryeqyteti është zgjuar sot nën ritmin e sportit me fillimin e edicionit të dhjetë të Maratonës së Tiranës, i cili ka startuar zyrtarisht në orën 08:00 të mëngjesit. Kjo ngjarje e madhe atletike ka bërë bashkë këtë vit rreth 5,800 pjesëmarrës në garë. E veçanta e këtij edicioni është përfshirja e garës 5-kilometroshe si një risi e re, me synimin për të inkurajuar sa më shumë qytetarë që t'i bashkohen këtij aktiviteti masiv. Për të garantuar një organizim dhe mbarëvajtje shembullore, përgatitjet kanë nisur prej gjashtë muajsh. Në terren janë angazhuar rreth 600 vullnetarë, 800 punonjës të Policisë së Shtetit, si dhe 500 punonjës nga Bashkia e Tiranës. Për shkak të zhvillimit të garave, lëvizja e automjeteve do të pësojë kufizime të dukshme deri në orën 16:00 në disa prej akseve më të rëndësishme rrugore të kryeqytetit. Ndallimi i qarkullimit përfshin të gjithë Unazën e Vogël të Tiranës, bulevardin “Zogu i Parë” dhe Bulevardin e Ri. Gjithashtu, të bllokuara do të jenë segmenti rrugor nga sheshi “Skënderbej” deri te sheshi “Nënë Tereza”, Rruga e Kavajës, Rruga e Durrësit, rruga “Myslym Shyri”, akset e zonës së ish-Bllokut, si dhe kryqëzimet që lidhin bulevardin kryesor me Rrugën e Elbasanit. Zhvillimi i këtij aktiviteti sportiv ka sjellë ndryshime edhe në funksionimin e transportit publik, ku disa prej linjave të autobusëve urbanë do të lëvizin me itinerare të devijuara gjatë ditës së sotme.