Kronika e një fatkeqësie të paralajmëruar: Çfarë nxorën në pah hetimet për vrasjen e Arlinda Zekajt?

Tragjedia e 25 tetorit 2026 në Vitomiricë të Pejës, ku u vra Arlinda Zekaj, vazhdon të mbajë në fokus përgjegjësinë e strukturave shtetërore dhe mënyrën se thellësia e dështimit institucional para se të ndodhte kjo vrasje. Përpara se jeta e saj t'i jepej fund dhunshëm, e ndjera kishte ngritur alarmin disa herë, duke kërkuar ndihmë e mbrojtje nga autoritetet për shkak të dhunës në familje dhe rrezikut të vazhdueshëm që i kanosej. Si autor i dyshuar për këtë krim tragjik është identifikuar ish-kunati i saj, Albert Sylaj. Vetëm tri ditë përpara ngjarjes, më 22 tetor, Zekaj kishte kërkuar takim urgjent me kryeprokuroren e Prokurorisë Themelore në Pejë, Lumturije Vuçetaj, duke kërkuar mbrojtje të menjëhershme për shkak të frikës për sigurinë e saj fizike. E njëjta situatë alarmi ishte ngritur edhe brenda strukturave të rendit. Më 23 tetor, një hetues policor kishte kërkuar nga eprorët e Policisë në Pejë që viktima të përfshihej në vizita të përditshme nga patrullat dhe të mbahej nën kontakt të vazhdueshëm për shkak të tensioneve të larta në mjedisin familjar. Edhe në ditën e vrasjes, më 25 tetor, Arlinda ishte paraqitur sërish në stacionin policor për të denoncuar thyerjen e urdhrit mbrojtës nga bashkëshorti i saj, veprim që solli ndalimin e tij për 48 orë. Megjithatë, pak çaste pasi ishte kthyer në shtëpinë e saj në Vitomiricë, ajo u ekzekutua. Kjo ngjarje e rëndë ka vënë në lëvizje organet e drejtësisë dhe inspektimit, të cilat kanë nisur një proces hetimor për të analizuar çdo veprim dhe mosveprim të zyrtarëve shtetërorë të përfshirë në trajtimin e dosjes së saj. Inspektimi konfirmon shkelje në Qendrën për Punë Sociale Më 14 nëntor 2026, Ministria për Punë, Familje dhe Vlerat e Luftës Çlirimtare bëri publike gjetjet e një inspektimi të jashtëzakonshëm të kryer në Qendrën për Punë Sociale (QPS) në Pejë. Sipas dokumentit zyrtar, menaxhimi i rastit të Arlinda Zekajt është shoqëruar me një mori lëshimesh, shkeljesh procedurale, shpërfillje të afateve ligjore dhe mungesë të theksuar të monitorimit. Një nga shkeljet më flagrante kishte të bënte me vonimin në dorëzimin e raportit të kërkuar nga Gjykata. Edhe pse aktvendimi i datës 24 shtator parashikonte një afat prej shtatë ditësh, ky dokument u dorëzua vetëm më 5 tetor. Për më tepër, menaxherja e ngarkuar me rastin nuk ishte paraqitur fare në seancën gjyqësore të 5 tetorit, pa ofruar asnjë arsyetim zyrtar për mungesën e saj. Inspektorati ka vërejtur gjithashtu se QPS-ja kishte dështuar të kryente vëzhgimet e nevojshme pas pranimit të aktvendimit të 7 shtatorit, pavarësisht se detyrimi ligjor ekzistonte edhe pa pasur një urdhër të veçantë nga ana e Gjykatës. Në raport theksohen edhe mangësi të tjera administrative, si moplotësimi i formularëve të kontaktit dhe të punës, mungesa e një Plani Individual të Shërbimeve, si dhe mungesa e mbikëqyrjes profesionale nga ana e udhëheqësit të Shërbimeve Sociale ndaj punës së menaxheres së rastit. Kërkohen masa ndëshkimore për dy zyrtarë Pas konstatimit të këtyre shkeljeve, Divizioni i Inspektimit i ka sugjeruar kryetarit të Komunës së Pejës marrjen e masave disiplinore ndaj menaxheres së rastit, T. G., si dhe ndaj udhëheqësit të Shërbimeve Sociale, D. K. Krahas masave ndëshkimore, dikasteri qeveritar ka kërkuar plotësimin e menjëhershëm të kapaciteteve me staf profesional të licencuar në QPS-në e Pejës, duke marrë parasysh ngarkesën e madhe të rasteve në këtë rajon. Një tjetër rekomandim përfshin zhvendosjen e Drejtorisë për Mirëqenie Sociale, respektivisht të drejtoreshës A. B., me qëllim të garantimit të autonomisë profesionale të Qendrës për Punë Sociale dhe ndarjes së qartë të kompetencave mes instancave komunale. Ministria ka kërkuar nga Komuna e Pejës që rekomandimet e dala nga ky raport të vihen në zbatim pa asnjë vonesë.