Nisma për pensionet kontributdhënëse: Pensionistët paralajmërojnë protesta nëse Qeveria nuk reflekton

Lidhja e Pensionistëve të Kosovës ka dalë në mbështetje të nismës ligjore të propozuar nga deputetja e Aleancës për Ardhmërinë e Kosovës (AAK), Teuta Haxhiu. Kjo iniciativë synon plotësim-ndryshimin e Ligjit për Skemat Pensionale, duke u mundësuar pension proporcional të gjithë atyre qytetarëve që kanë paguar kontribute para vitit 1999, por që nuk i plotësojnë kriteret aktuale për të përfituar pension të plotë kontributpagues. Kryetari i Lidhjes së Pensionistëve të Kosovës, Sherif Kastrati, ka bërë me dije se një ide e tillë është ngritur edhe më parë dhe duhet të përkrahet plotësisht, pasi u vjen në ndihmë qytetarëve që kanë kontribuar ndër vite në sistemin pensional. Lidhur me këtë propozim, Kastrati theksoi: “Iniciativa e AAK-së ka qenë edhe më herët, është për ta përkrahur, duhet të presim çka do të thotë”. Pavarësisht rëndësisë së kësaj çështjeje, përfaqësuesit e pensionistëve ende nuk kanë zhvilluar një takim zyrtar me ekzekutivin. Megjithatë, ata shpresojnë se dialogu do të realizohet së shpejti, me qëllim që kërkesat e tyre të përfshihen në planifikimin e Buxhetit për vitin 2027. “Nuk jemi takuar, presim takim me Qeverinë, mirëpo shpresojmë që të bëhet ky ligj sepse do të ndihmonte. Ne presim që të reflektojë Qeveria, që të bëhet një përfshirje në buxhetin e vitit 2027, ne do të ndërmarrim hapat tonë pastaj”, është shprehur ai. Udhëheqësi i pensionistëve paralajmëroi se mosmarrja parasysh e kërkesave të tyre mund t'i shtyjë drejt veprimeve protestuese. Ai sqaroi se po bëhen përpjekje intensive për të evituar daljen në rrugë përmes takimeve me drejtuesit e institucioneve, duke pasur parasysh se gjendja e kësaj kategorie është e rëndë dhe protestat mund të kenë pasoja të rënda për shëndetin e tyre. Në përmbyllje të deklaratës së tij, Kastrati bëri me dije se u janë drejtuar me kërkesa krerëve më të lartë të shtetit, mirëpo deri më tani kanë gjetur dyer të hapura vetëm te një përfaqësues. “Ne do të dalim në rrugë me gjysmë shpirti, ndoshta dikush do të mbesë aty në protestë. Ne kemi dërguar kërkesa te presidentja, kryetarja e Kuvendit, momentalisht na ka pranuar vetëm Andin Hoti. Shpresojmë që edhe të tjerët na pranojnë në takim, që të evitohet më e keqja, të mos dalim të protestojmë në rrugë”, deklaroi Kastrati.