Kompania 'AS Senjak' hedh poshtë akuzat e VLEN-it: S’kemi marrë kredi në Serbi, do të kërkojmë drejtësi

Kompania 'AS Senjak' ka reaguar zyrtarisht ndaj pretendimeve të ngritura në konferencat për shtyp nga koalicioni VLEN, duke mohuar kategorikisht çdo lidhje financiare me 'Alta Banka' në Serbi. Përmes një deklarate për opinionin publik, kompania ka paralajmëruar se do të ndërmarrë hapa ligjorë për të mbrojtur imazhin dhe integritetin e saj nga ajo që e konsideron si fushatë dezinformimi. Ditëve të fundit, në hapësirën publike janë shpërndarë informacione të pavërteta lidhur me veprimtarinë e 'AS Senjak'. Për të shuar çdo paqartësi, kompania nënvizon se nuk ka kontraktuar asnjë kredi nga banka në fjalë, e as nuk ka pasur ndonjë rol në procesin e depërtimit të këtij institucioni financiar në tregun e Maqedonisë së Veriut, proces ky që është ekskluzivisht nën juridiksionin e organeve shtetërore. Në reagimin e tyre, përfaqësuesit e 'AS Senjak' shprehen të shqetësuar se emri i kompanisë po shfrytëzohet për qëllime politike, duke u përfshirë padrejtësisht në përplasje që nuk kanë asnjë lidhje me punën e tyre. Ata theksojnë se subjekti i tyre është një kompani private e pavarur, vendimet e së cilës merren pa ndikimin e faktorëve të jashtëm apo politikë. Duke mbrojtur reputacionin e ndërtuar ndër vite mbi parimet e ligjshmërisë dhe korrektësisë, 'AS Senjak' njofton se do të kërkojë përgjegjësi ligjore ndaj çdo individi apo subjekti që vazhdon të shpërndajë shpifje që cenojnë emrin e kompanisë. Ata do t'i drejtohen institucioneve kompetente për të adresuar këto pretendime të pabaza. Në mbyllje të deklaratës, kompania siguron se fokusi i saj mbetet i pandryshuar: përkushtimi ndaj punonjësve dhe familjeve të tyre, të cilët përmes punës së ndershme kontribuojnë në zhvillimin dhe të ardhmen e këtij subjekti ekonomik.