Incident në aeroportin e Miamit: Përplasja mes dy avionëve lë dy të lënduar

Një përplasje ndërmjet dy avionëve ka ndodhur mbrëmjen e së shtunës në Aeroportin Ndërkombëtar të Miamit, duke shkaktuar lëndime të lehta për dy persona. Ngjarja është regjistruar rreth orës 21:15, në momentin kur të dy mjetet fluturuese po zhvendoseshin në pistat lidhëse të aeroportit. Sipas informacioneve të siguruara, incidenti ka përfshirë një avion transportues të kompanisë UPS dhe një avion pasagjerësh të kompanisë Copa Airlines, i cili po vinte nga Panama City. Piloti i avionit të pasagjerëve ka njoftuar kontrollorët e trafikut ajror se krahu i mjetit të tij kishte goditur pjesën ballore të avionit të UPS-it, i cili ishte duke u përgatitur për t'u nisur drejt Bogotas, në Kolumbi. Në komunikimin zyrtar me kullën e vrojtimit, piloti i avionit të UPS-it ka pranuar përgjegjësinë, duke deklaruar se kishte tejkaluar distancën e lejuar gjatë lëvizjes në pistë, çka ka çuar në kontaktin fizik me avionin tjetër.