Izet Mexhiti nga New Yorku: Diaspora shqiptare në SHBA mbetet mbështetja jonë kyçe

Bashkëkryetari i koalicionit VLEN, Izet Mexhiti, ka marrë pjesë në mbrëmjen gala të organizuar nga Këshilli i Marrëdhënieve Shqiptaro-Amerikane në New York, ku ka theksuar rëndësinë e bashkëpunimit të ngushtë me mërgatën për sfidat e ardhshme. Duke folur për rëndësinë e këtij takimi, Mexhiti shprehu mirënjohjen e thellë për rolin e pazëvendësueshëm që diaspora ka luajtur ndër vite në mbështetje të çështjes kombëtare. Ai nënvizoi se prania e tij në këtë ngjarje shërben për të koordinuar veprimet e ardhshme dhe për të fuqizuar lidhjet me komunitetin shqiptar në Shtetet e Bashkuara të Amerikës. “Shfrytëzoj rastin të përshëndes diasporën shqiptare, po edhe falënderoj për kontributin që e ka dhënë vazhdimësi në të gjitha proceset, për kombin shqiptar. Prandaj edhe sot edhe këtu erdhëm me kënaqësi në ftesën e Këshillit Shqiptaro-Amerikan, për të bashkëbiseduar, për të bashkërenditur aktivitetet e ardhshme. Kemi pasur nevojë dhe kemi nevojë, domethënë, për ndihmën e shqiptarëve në Amerikë, dhe sidomos për qasjen dhe relacionet e tyre me Kongresin dhe Senatin Amerikan”, u shpreh Mexhiti. Gjatë qëndrimit në New York, krahas angazhimeve në kuadër të punimeve të Këshillit të Sigurimit të OKB-së, delegacioni ka zhvilluar një sërë takimesh me personalitete dhe përfaqësues të shoqatave të ndryshme shqiptaro-amerikane, të cilat kanë shprehur gatishmëri të plotë për bashkëpunim të mëtejshëm. “Këtu është edhe Këshilli OKB-së, janë prezent kryeministrat. Është edhe kryeministri i Maqedonisë, ministri i Punëve të Jashtme, është edhe kryeministri i Kosovës, kryeministri i Shqipërisë. Ka edhe takime spontane, por veçanërisht jemi ndaluar për të takuar shoqatat e ndryshme të diasporës, të cilat kanë dhënë vazhdimisht kontribut dhe e kanë vullnetin për të dhënë edhe në të ardhmen, për t’i bashkërenduar aktivitetet bashkë”, shtoi ai.