Valë e re akuzash ndaj Russell Brand: Komediani përballet me hetime shtesë për abuzim seksual

Russell Brand po përballet me një front të ri të hetimeve policore, pasi të paktën tetë gra të tjera kanë dalë publikisht me akuza për abuzim seksual dhe sjellje të papërshtatshme ndaj 51-vjeçarit britanik. Kjo zhvillim vjen menjëherë pas dënimit të tij më 9 nëntor, ku u shpall fajtor për përdhunimin e një gruaje dhe sulmet seksuale ndaj tri të tjerave, duke u dënuar me dhjetë vjet e gjashtë muaj burg. Tashmë, autoritetet po shqyrtojnë dëshmi të reja që kanë dalë në dritë pas vendimit të gjykatës, duke hapur mundësinë për një proces të dytë gjyqësor. Hetuesit janë në fazën përfundimtare të shqyrtimit të dosjeve për dy raste të tjera të rënda, përfshirë pretendimin se Brand ka kryer përdhunim ndaj një të miture 16-vjeçare. Mes akuzuesve është edhe ish-partnerja e tij, Jordan Martin, e cila në një dokumentar të ri të platformës Netflix rrëfen përvojën e saj traumatike, duke pretenduar se ishte sulmuar seksualisht dhe ishte vënë nën kontroll të rreptë, deri në atë pikë sa ai e kishte detyruar t'i lante dhëmbët deri në gjak. Në të njëjtën kohë, dëshmi të ndryshme janë publikuar edhe nga gjashtë gra të tjera, të cilat kanë denoncuar sjellje abuzive dhe marrëdhënie seksuale pa pëlqim. Një rrëfim prekës vjen edhe nga gazetarja Bryony Gordon, e cila përshkroi përvojën e saj gjatë një takimi me Brand kur ishte 25 vjeçe, duke rrëfyer se si për një kohë të gjatë e kishte fajësuar veten për shqetësimin që kishte ndjerë pas atij takimi. Këto zhvillime pasojnë dënimin e tij për vepra penale të kryera në periudhën mes viteve 2004 dhe 2009. Megjithatë, pretendimet e reja janë aktualisht objekt i hetimeve policore dhe ende nuk kanë marrë një epilog përfundimtar në sallat e gjyqit.