Kosova nën pushtetin e reshjeve: Përmbytje në Prishtinë, dëme materiale në Deçan e Junik

Reshjet e vazhdueshme të shiut gjatë natës së kaluar dhe ditës së sotme kanë sjellë sfida të mëdha për infrastrukturën rrugore në mbarë vendin. Përveç qarkullimit të vështirësuar në shumë akse, kryeqyteti është përballur me bllokime të përkohshme të nënkalimeve, ndërsa dëme materiale janë evidentuar edhe në komunat e Junikut dhe Deçanit. Në Prishtinë, situata ka qenë veçanërisht problematike pranë Stacionit të Autobusëve dhe në lagjen Dardania, ku grumbullimi i madh i ujit ka bërë të pamundur kalimin e lirë të automjeteve, duke krijuar kolona të gjata në trafik. Këto pika kritike vazhdojnë të jenë sfidë për drejtuesit e automjeteve sa herë që intensiteti i rreshjeve shtohet. Lulzim Fushtica, Drejtor për Siguri dhe Emergjenca në Komunën e Prishtinës, ka bërë të ditur se pavarësisht vështirësive, nuk janë regjistruar dëme të mëdha materiale. Ai sqaroi se ekipet komunale kanë ndërhyrë në pikat më të rrezikuara, duke vënë theksin te rrugët magjistrale që janë nën juridiksionin e ministrisë. “Kemi pasur probleme në rrugën që vjen nga Mitrovica, saktësisht te Stacioni i Autobusëve pranë qendrës tregtare ‘Dardha’, si dhe në rrugën ‘Agim Ramadani’, për të cilat jemi njoftuar edhe nga Policia e Kosovës”, deklaroi Fushtica. Instituti Hidrometeorologjik i Kosovës, përmes përfaqësuesit Besim Aliu, ka paralajmëruar se moti i paqëndrueshëm do të vazhdojë. Sipas tij, ditët në vijim do të shoqërohen me reshje shiu, ndërsa temperaturat maksimale nuk do të kalojnë vlerën 16 gradë Celsius. Pavarësisht intervaleve me diell, situata meteorologjike mbetet e ndjeshme. Era e fortë dhe sasia e madhe e ujit kanë lënë gjurmë edhe në zona të tjera të vendit. Në disa komuna, përfshirë Junikun dhe Deçanin, janë raportuar rrëzime të shtyllave elektrike dhe lisave, të cilët kanë penguar qarkullimin në rrugët kryesore. Megjithatë, gjatë ditës së shtunë, intensiteti i situatës ka shënuar një rënie, duke e bërë menaxhimin e pasojave më të lehtë për ekipet në terren. Kjo situatë rikujton fillimin e janarit të këtij viti, kur disa komuna të Kosovës u përballën me vërshime të rënda, të cilat shkaktuan dëme të konsiderueshme për banorët dhe infrastrukturën publike.