Tragjedi në Itali: Flakët përfshijnë pallatin, humbin jetën dy persona dhe plagosen 13 të tjerë

Një ngjarje e rëndë ka tronditur mbrëmjen e kaluar qytetin e Luccës në Itali, ku një zjarr i madh ka kapluar një ndërtesë banimi trekatësh në lagjen San Vito, duke lënë të vdekur një burrë dhe një grua. Përveç viktimave, flakët e fuqishme shkaktuan plagosjen e 13 banorëve, ndërsa forcat e zjarrfikësve arritën të shpëtonin mrekullisht një foshnjë të porsalindur gjatë aksionit të evakuimit. Sipas autoriteteve lokale, incidenti ndodhi në një pallat në rrugën "Via Bertini", në kryqëzim me "Via Corsica", ku dyshimet e para sugjerojnë se vatra e zjarrit u aktivizua në katin përdhes të një prej apartamenteve. Dy viktimat, të cilët bashkëjetonin toc në banesën ku nisi fatkeqësia, u gjetën pa shenja jete nga ekipet e shpëtimit pasi u vu nën kontroll situata; trupi i gruas u zbulua në ambientet e dhomës së ndenjes, kurse ai i burrit në dhomën e gjumit, ku paraprakisht dyshohet se ka ndërruar jetë si pasojë e asfiksisë nga tymi dhe gazrat toksikë. Banorët e kateve të sipërme u detyruan të ngjiteshin në tarraca për të shpëtuar nga flakët, duke pritur atje ndërhyrjen e ekipeve emergjente. Në mesin e personave të lënduar, gjendja e një gruaje paraqitet kritike dhe ajo është dërguar urgjentisht në Qendrën e Specializuar të Djegieve në Pisa për ndihmë mjekësore më të avancuar. Ndërkohë, nëntë të lënduar të tjerë u shpërndanë nëpër spitalet rajonale të Luccës, Versilias dhe Pisës, kurse tre të tjerë morën ndihmën e parë mjekësore në vend. Policia dhe ekspertët e zjarrfikësve po kryejnë verifikimet në terren për të zbuluar shkaqet e sakta të kësaj tragjedie, ku hipoteza kryesore flet për një zjarrvënie aksidentale, megjithëse hetimet sapo kanë nisur. Si pasojë e dëmeve të mëdha strukturore, pallati është shpallur zyrtarisht i pabanueshëm. Administrata e Bashkisë së Luccës ka ndërhyrë menjëherë duke nisur procedurat administrative për të siguruar strehim të përkohshëm për të gjitha familjet e mbetura pa shtëpi, ndërsa organet kompetente vijojnë hetimet e thelluara për të zbardhur rrethanat e plota të ngjarjes.