Romario shpërthen ndaj Ancelottit: Koha për të ikur, mjaft më me dështime

Legjenda e futbollit brazilian, Romario, ka kërkuar zyrtarisht largimin e Carlo Ancelottit nga stoli i kombëtares së Brazilit. Ky reagim i ashpër vjen pas humbjes zhgënjyese 3:2 ndaj Japonisë, në miqësoren e zhvilluar në Singapor. Ish-sulmuesi i famshëm nuk ka kursyer kritikat për punën e italianit, duke kërkuar ndërhyrje urgjente nga drejtuesit e Federatës Braziliane të Futbollit (CBF). Nëpërmjet një postimi në llogarinë e tij në Instagram, Romario e ftoi hapur Ancelottin që t'i japë fund aventurës së tij me 'Seleçaon'. Pavarësisht se pranoi madhështinë e italianit në nivel klubesh, ai theksoi se Ancelotti ka dështuar të lërë gjurmë në krye të përfaqësueses. “Ancelotti, mjaft më! Merr gjërat dhe ik! Askush nuk ta mohon historinë, por në kombëtaren braziliane nuk ke treguar asgjë nga ajo që pritej”, shkroi ndër të tjera fituesi i Botërorit. Në mesazhin e tij drejtuar presidentit të CBF-së, Samir Xaud, Romario kërkoi guxim për të marrë vendime të vështira. Sipas tij, futbolli brazilian nuk mund të vazhdojë të përjetojë poshtërime të tilla, duke rrezikuar seriozisht edhe pjesëmarrjen në Kampionatin e ardhshëm Botëror. Ai këshilloi teknikun italian që t'i rikthehet drejtimit të ekipeve të klubeve, pasi përvoja e tij në kombëtare po rezulton e dështuar. Ndeshja ndaj Japonisë u shoqërua edhe me tensione, ku përveç Raphinhas, edhe vetë Carlo Ancelotti u ndëshkua me karton të kuq. Trajneri italian sqaroi se përjashtimi erdhi për shkak të vështirësive në menaxhimin e bankinës, ndërsa kritikoi gjyqtarin për mungesë përvoje në administrimin e një ndeshjeje të nivelit të lartë. Pavarësisht rezultatit negativ, Ancelotti vlerësoi përpjekjet e lojtarëve të rinj që debutuan në këtë përballje. Brazili pritet të kthehet në fushë të martën, më 17 nëntor, në një duel historik kundër Singaporit. Kjo sfidë shihet si një mundësi tjetër për Ancelottin që të bëjë eksperimente në formacion, ndonëse presioni mbi të pas kërkesave për shkarkim është rritur ndjeshëm.