“Boll më me këtë regjim”, qytetarja shpërthen në protestë: Rama dhe ministrat e tij po shkatërrojnë të ardhmen e fëmijëve tanë

Një protestë e mbajtur së fundmi në Tiranë ka nxjerrë në pah pakënaqësinë e thellë të qytetarëve ndaj situatës aktuale sociale dhe politike në vend. Mes turmës, një qytetare ka shprehur revoltën e saj të hapur ndaj qeverisë, duke e cilësuar gjendjen e spitaleve dhe sistemit arsimor si tejet kritike. “Ne po protestojmë sepse Shqipëria ka degraduar. Spitalet tona janë në gjendje katastrofike dhe askush nga pushtetarët nuk e ndjen këtë realitet, pasi fëmijët e tyre arsimohen jashtë vendit, larg realitetit tonë të vështirë”, u shpreh ajo, duke shtuar se qytetarët e thjeshtë detyrohen të punojnë në dy vende pune vetëm për të mbajtur familjet e tyre gjallë. Qytetarja akuzoi qeverinë për shpërfillje ndaj nevojave të popullit dhe për mungesën e perspektivës për të rinjtë. Sipas saj, është koha që kjo qeverisje të marrë fund, pasi nuk ofron asnjë zgjidhje për problemet jetike të shqiptarëve. Në deklaratën e saj, ajo nuk kurseu as kritikat për sjelljen e forcave të rendit gjatë protestave, duke theksuar se kryeministri Edi Rama përdori policinë ndaj qytetarëve të pambrojtur. “Ne ia kemi dhënë votën dhe ne kemi fuqinë t’ia heqim. Është momenti që ata të largohen paqësisht, përpara se situata të përshkallëzohet. Boll më me këtë shpërfillje ndaj nesh”, përfundoi ajo.