Kurti vlerëson paraqitjen e Kosovës: Me 11 lojtarë do ta kishim mposhtur Izraelin

Kryeministri i Kosovës, Albin Kurti, ka shprehur vlerësimin e tij për angazhimin e futbollistëve të përfaqësueses së Kosovës në përballjen e zhvilluar kundër Izraelit, e cila u mbyll me rrjeta të paprekura, 0-0. Nëpërmjet një reagimi në rrjetet sociale, kreu i ekzekutivit kosovar ka analizuar rrjedhën e lojës në stadiumin “Fadil Vokrri”. Sipas tij, përjashtimi i një lojtari nga loja në minutën e 66-të ishte faktori vendimtar që pengoi ekipin vendas të siguronte fitoren. “Përgëzime futbollistëve të Kosovës për lojën e bukur sot në stadiumin ‘Fadil Vokrri’ ndaj Izraelit. Po të mos ndëshkoheshim me karton të kuq në minutën 66, do të mund të shënonim dhe fitonim, por koha nuk kthehet prapa. Vazhdojmë përpara për fitore në ndeshjet e radhës!”, ka shkruar Kurti në mesazhin e tij mbështetës. Pas këtij barazimi, përfaqësuesja e Kosovës ka shtuar një pikë në llogarinë e saj, duke arritur në kuotën e gjashtë pikëve pas pesë ndeshjeve të zhvilluara në këtë cikël kualifikues.