Ndryshon masa për ish-drejtorin e Spitalit të Mitrovicës: Gëzim Berisha lë arrestin shtëpiak

Ish-drejtori i Spitalit të Përgjithshëm në Mitrovicë, Gëzim Berisha, i cili po hetohet nën dyshimet për veprën penale të dhunës në familje, nuk do të qëndrojë më në arrest shtëpiak. Gjykata e Apelit ka vendosur ta zëvendësojë këtë masë me atë të ndalimit për t’iu afruar personit të caktuar. Lajmin për ndryshimin e masës e ka konfirmuar Mirlinda Gashi, zëdhënëse e Gjykatës Themelore në Prishtinë. Ajo bëri të ditur se ky vendim erdhi pas aprovimit të ankesës së bërë nga mbrojtësi ligjor i të pandehurit. Sipas aktvendimit të Apelit, masa e mëparshme e arrestit shtëpiak, e cila ishte caktuar për periudhën nga 30 tetori deri më 29 nëntor 2026, është shfuqizuar dhe zëvendësuar me masën e ndalimit të afrimit, duke ndryshuar kështu vendimin e shkallës së parë të Gjykatës Themelore në Prishtinë. Në anën tjetër, Shërbimi Spitalor Klinik Universitar i Kosovës (ShSKUK) ka ndërmarrë veprime administrative ndaj Berishës, duke e pezulluar atë nga detyra e drejtorit të Spitalit të Mitrovicës. Ky vendim ishte marrë nga institucioni shëndetësor menjëherë pas caktimit të masës fillestare të arrestit shtëpiak ndaj tij. Kujtojmë se Gjykata Themelore në Prishtinë fillimisht kishte vlerësuar se arresti shtëpiak ishte masa e duhur për të garantuar zhvillimin e papenguar të procedurës penale, për të parandaluar përsëritjen e veprës, si dhe për të ofruar mbrojtje për palën e dëmtuar.