Agron Shehaj nga protesta: Reforma Zgjedhore, tentativa e radhës për mbajtjen e pushtetit

Kryetari i Partisë Mundësia, Agron Shehaj, ka hedhur akuza të ashpra ndaj elitës politike në vend, duke e cilësuar procesin aktual të Reformës Zgjedhore si një mekanizëm për të siguruar interesat e ngushta të pushtetarëve. Në fjalën e tij gjatë protestës, Shehaj nënvizoi se ndërsa qytetarët kanë gjashtë muaj që kërkojnë largimin e kryeministrit Edi Rama dhe shkëputjen nga kjo klasë politike, palët po mundohen të ndryshojnë rregullat e lojës zgjedhore nën petkun e demokratizimit, me synimin e vetëm për të ruajtur status quo-në. Sipas Shehajt, ky skenar nuk është gjë tjetër veçse një pazar mes palëve për të siguruar jetëgjatësinë e tyre politike. Ai hodhi poshtë pretendimet se ndryshimet po bëhen për të mirën e qytetarëve, duke i cilësuar ato si përpjekje për të manipuluar sistemin në favor të pushtetit të korruptuar. Lideri i Partisë Mundësia garantoi se mobilizimi qytetar nuk do të ndalet. Ai theksoi se beteja për një Shqipëri ndryshe dhe për të ardhmen e vendit do të vijojë me vendosmëri, derisa të arrihet largimi i plotë i klasës së vjetër politike nga qeverisja e vendit.