Aksident i rëndë në aksin Qukës-Prrenjas: Përplasja e fuqishme lë të plagosur një drejtues mjeti

Një aksident i rëndë rrugor është regjistruar ditën e sotme në rrugën nacionale Qukës-Prrenjas, konkretisht në afërsi të urës së Torromanit. Përplasja mes dy automjeteve ka qenë mjaft e fortë, duke bërë që të dyja mjetet të dalin jashtë rrugës. Si pasojë e këtij incidenti, njëri prej drejtuesve të mjeteve ka marrë lëndime trupore dhe është transportuar me urgjencë drejt institucionit spitalor për të marrë trajtimin e nevojshëm mjekësor. Nga pamjet në vendngjarje, automjetet kanë pësuar dëme të konsiderueshme materiale, duke u shkatërruar thuajse plotësisht. Sipas informacioneve paraprake, shkak për këtë ngjarje dyshohet të jetë bërë lagështia e shtuar në asfalt, e cila ka ndikuar në humbjen e kontrollit. Në vendngjarje kanë mbërritur forcat zjarrfikëse, të cilat kanë ndërhyrë për të larguar automjetet e dëmtuara dhe për të pastruar rrugën nga derdhjet e vajrave, me qëllim shmangien e rrezikut për aksidente të tjera.