Gara për KLGJ: Kandidatët shpalosin platformat dhe kërkojnë një drejtësi më cilësore e të mbështetur

Në kuadër të procesit për zgjedhjen e tre anëtarëve të rinj të Këshillit të Lartë Gjyqësor, garuesit që synojnë përfaqësimin e Gjykatës së Lartë kanë paraqitur vizionin dhe synimet e tyre për pesëvjeçarin e ardhshëm, gjatë një mbledhjeje të ndjekur nga gazetarja Anila Hoxha. Arbena Ahmeti, kandidate për këtë institucion nga radhët e Gjykatës së Lartë, vuri theksin te domosdoshmëria e një bashkëpunimi më të ngushtë ndërinstitucional dhe te dhënia e një mbështetjeje më të madhe për trupën gjyqësore. “KLGJ duhet të bashkëpunojë aktivisht me institucionet përgjegjëse. Shoqatat e gjyqtarëve përballen me mungesë fondesh dhe infrastrukture, ndaj Këshilli duhet të ofrojë mbështetje”, u shpreh Ahmeti. Duke kërkuar mbështetjen e kolegëve, ajo shtoi: “Nëse më jepni besimin tuaj për pesë vitet e ardhshme, premtoj që do të kemi një gjyqësor të mirë”. Nga ana e tij, Sandër Simoni, gjithashtu kandidat nga Gjykata e Lartë, e cilësoi situatën aktuale të sistemit si një fazë konsolidimi, por edhe si një sprovë të vërtetë për shkak të ngarkesës së lartë në detyrë. “Pushteti gjyqësor është në një fazë konsolidimi dhe në momente sprove, për shkak të ngarkesës në punë”, tha Simoni. Ai solli në vëmendje ngjarje që kanë testuar qëndrueshmërinë e sistemit: “Ngjarja e rëndë e humbjes së kolegut dhe konflikti i pagave ishin sprovë, së pari për garantimin e sigurisë dhe për respektimin e vendimeve të Gjykatës Kushtetuese”. Ndërkohë, Fatri Islamaj, i cili garon si përfaqësues nga Gjykata e Apelit, u përqendrua te vështirësitë e shumta me të cilat përballet drejtësia shqiptare. “Sfidat janë të shumta. Agresioni i paprecedentë me të cilin u përballëm gjatë këtij muaji për pagat përbën goditjen më arrogante”, deklaroi Islamaj. Ai veçoi disa nga pikat kryesore që sipas tij kërkojnë ndërhyrje urgjente nga KLGJ-ja: “Përshpejtim në kohë të vlerësimit të gjyqtarëve, rishikim të numrit të gjyqtarëve, sidomos në gjykatat ku ka stok, si dhe përmirësim të infrastrukturës. KLGJ duhet të jetë më pranë gjykatave”. Igerta Hysi, kandidate nga Gjykata e Apelit të Posaçëm, orientoi vëmendjen te karriera e gjyqtarëve, ngritja në detyrë, standardi i vendimmarrjes dhe roli i administratës gjyqësore. “Secili nga ne duhet të ketë bindjen se promovimi nuk varet nga afërsia me KLGJ-në, por nga aftësia dhe puna. Besimin që kërkojmë nga qytetarët duhet ta ndiejmë vetë nga brenda sistemit”, u shpreh Hysi. Ajo theksoi se do të mbështesë arsyetimin në kohë të vendimeve, duke mos u mjaftuar vetëm me statistika, por duke synuar cilësi të lartë. Sipas saj, vëmendje e veçantë i duhet kushtuar edhe administratës: “Një gjyqtar nuk mund ta bëjë i vetëm punën, ndaj administrata meriton respekt dhe mbështetje. Duhet rishikuar shtimi i numrit të ndihmësve ligjorë”. Nga ana tjetër, Brunilda Kadi, kandidate për KLGJ nga Gjykata e Shkallës së Parë Tiranë, u mbështet te bagazhi i saj profesional dhe përvoja e mëparshme brenda këtij Këshilli. “Përvoja e mëparshme gjatë mandatit të parë, nga 2016 deri në 2021, dhe karriera në gjyqësor më kanë ndihmuar ta njoh më mirë sistemin”, tha Kadi. Ajo shtoi se gjatë periudhës së parë ka kuptuar se Këshilli kishte nevojë të ndërtonte identitetin e tij, ndërsa rikthimi në sistem e ka vënë përballë realiteteve të reja. “Kur u riktheva, u përballa me sfida të tjera me të cilat ndeshet gjyqësori, pasi KLGJ nuk dëgjon gjyqtarët vetëm kur problemi është bërë i padurueshëm”, u shpreh ajo, duke përmbyllur prezantimin e saj para kolegëve.