Mbështetje për 'Dardanët': Hashim Thaçi rikujton mesazhin motivues për Kombëtaren e Kosovës

Ish-presidenti i Kosovës, Hashim Thaçi, ka shpërndarë sërish në rrjetet e tij sociale një mesazh mbështetës drejtuar Kombëtares së futbollit, të publikuar fillimisht më 14 nëntor të vitit 2019. Në atë kohë, Thaçi kishte zgjedhur këto fjalë për t'iu drejtuar futbollistëve kosovarë, duke theksuar se krenaria dhe emocionet që ata përcjellin tejkalojnë çdo rezultat të mundshëm në fushën e blertë: “Në humbje dhe fitore, me ose pa pikë, të kualifikuar apo jo, ju na keni dhënë shumë emocione, shumë krenari. Jeni heronjtë tanë. Jeni shpresa jonë! HTH”. Ky veprim simbolik vjen në një ditë kur vëmendja e opinionit publik ishte përqendruar te stadiumi “Fadil Vokrri”, ku Kosova zhvilloi ndeshjen e saj kundër Izraelit në kuadër të Ligës së Kombeve. Ndonëse lojtarët e Kosovës treguan angazhim dhe krijuan disa mundësi shënimi gjatë 90 minutave, përballja përfundoi me rezultatin e bardhë 0-0.