Martin Odegaard thyen heshtjen: E ardhmja ime është te Arsenali

Mesfushori i talentuar norvegjez, Martin Odegaard, ka hedhur poshtë spekulimet e fundit që e lidhin atë me një largim të mundshëm drejt Bayern Munichut. Futbollisti ka shprehur qartë dëshirën e tij për të vazhduar rrugëtimin me fanellën e Arsenalit edhe përtej qershorit të vitit 2028, kur edhe skadon marrëveshja e tij aktuale. Në një prononcim për mediat, ndërsa po përgatitej me kombëtaren e Norvegjisë, ish-lojtari i Real Madridit konfirmoi lidhjen e tij të fortë me klubin londinez. Megjithatë, ai sqaroi se pavarësisht dëshirës për të qëndruar, bisedimet zyrtare për zgjatjen e kontratës ende nuk kanë marrë një rrugë konkrete. “Ndihem shumë mirë këtu dhe dëshira ime është të mbetem pjesë e Arsenalit për një periudhë të gjatë, por deri në këto momente nuk kemi nisur negociatat për rinovimin,” u shpreh mesfushori, duke i dhënë fund paqartësive për të ardhmen e tij të afërt. Nga ana tjetër, vëmendja e Bayern Munichut mbetet e lartë. Duke marrë parasysh se në fund të këtij sezoni Odegaard do të hyjë në 12-muajshin e fundit të kontratës së tij, gjigantët bavarezë po monitorojnë situatën me kujdes. Megjithatë, për momentin, fokusi i kapitenit norvegjez mbetet i përqendruar tërësisht te objektivat e tij me skuadrën e Arsenalit.