Tragjedi në Klinë: 43-vjeçarja ndërron jetë pas infuzionit, ambulanca pa sinjale emergjente

Një ngjarje e rëndë ka tronditur qytetin e Klinës, ku një grua 43-vjeçare ka humbur jetën gjatë transportit nga Qendra Kryesore e Mjekësisë Familjare (QKMF) drejt Spitalit të Përgjithshëm të Pejës. Përkeqësimi i gjendjes së saj shëndetësore ndodhi menjëherë pasi ajo mori trajtim me infuzion në institucionin shëndetësor në Klinë. Sipas QKMF-së në Klinë, pacientja kishte vizituar një mjek infektolog i cili i kishte përshkruar terapinë përkatëse. Mirëpo, sapo kishte nisur marrja e infuzionit, ajo shfaqi një reaksion të rëndë alergjik. Stafi mjekësor, përfshirë një mjek internist, ndërmori masat e menjëhershme për ta stabilizuar, por për shkak të gjendjes kritike, u vendos dërgimi i saj për trajtim të mëtejshëm në spitalin rajonal. Nga Spitali i Përgjithshëm i Pejës konfirmojnë se pacientja arriti atje pa shenja jete. Pavarësisht përpjekjeve të vazhdueshme të ekipit mjekësor për reanimim, mjekët u detyruan të konstatojnë vdekjen e saj. Një detaj shqetësues që ka shoqëruar transportin e viktimës është fakti se autoambulanca e QKMF-së nuk i kishte funksionale pajisjet e sinjalizimit emergjent. Zëdhënësi i Policisë për Rajonin e Pejës, Sheremet Elezaj, bëri të ditur se një patrullë policore është angazhuar për të shoqëruar automjetin deri në spital, pas kërkesës së stafit mjekësor pikërisht për shkak të këtij defekti teknik. Prokuroria Themelore në Pejë ka nisur menjëherë hetimet për të zbardhur rrethanat e ngjarjes. Zëdhënësi i Prokurorisë, Shkodran Nikçi, njoftoi se Prokurorja e Krimeve të Rënda ka urdhëruar grumbullimin e raporteve mjekësore dhe intervistimin e personelit të përfshirë. Trupi i pajetë i viktimës është dërguar në Institutin e Mjekësisë Ligjore për autopsi, e cila do të përcaktojë shkakun e saktë të vdekjes dhe do t'i hapë rrugë procedurave të mëtejshme ligjore.