Kosova ndalet në barazim pa gola ndaj Izraelit në stadiumin 'Fadil Vokrri'

Përfaqësuesja e Kosovës nuk ka arritur të arkëtojë më shumë se një pikë në përballjen e zhvilluar në shtëpi kundër Izraelit, duke u ndarë me një barazim 0-0 në stadiumin 'Fadil Vokrri'. 'Dardanët' dominuan lojën për pjesën më të madhe të takimit, duke ushtruar presion të vazhdueshëm dhe duke krijuar mundësi të shumta shënimi deri në minutën e 67-të. Megjithatë, rrjedha e ndeshjes ndryshoi pas këtij momenti, kur Veldin Hoxha u ndëshkua me kartonin e dytë të verdhë, duke e lënë ekipin me një lojtar më pak në fushë. Në kohën e mbetur, Izraeli mori kontrollin e lojës në përpjekje për të shfrytëzuar epërsinë numerike, por asnjëra skuadër nuk arriti ta gjejë rrugën drejt rrjetës, duke e mbyllur sfidën pa gola. Pas këtij rezultati, Kosova vazhdon të qëndrojë në pozitën e dytë në tabelë me 6 pikë të grumbulluara nga 5 ndeshje, ndërsa Izraeli mbetet në fund me 3 pikë. Në xhiron e radhës, Kosova do të jetë mysafire e Irlandës, kurse Izraeli do të jetë nikoqir i Austrisë.