Kurti nga Dublini: Kosova kërkon trajtim të barabartë në rrugën drejt BE-së

Kryeministri i Kosovës, Albin Kurti, gjatë qëndrimit të tij në Dublin, ka adresuar stanjacionin e procesit të integrimit evropian të Kosovës, duke kërkuar zyrtarisht vlerësimin e aplikacionit për anëtarësim dhe hapjen e negociatave. Ai vuri në pah faktin se Kosova mbetet vendi i vetëm në rajonin e Ballkanit Perëndimor që ende nuk gëzon statusin e kandidatit për në Bashkimin Evropian. Në kuadër të vizitës së tij në Institutin për Çështje Ndërkombëtare dhe Evropiane (IIEA), ku mbajti një fjalim me temën “Rrugëtimi i Kosovës: nga shtetësia drejt integrimit evropian”, shefi i ekzekutivit u prit nga drejtori i përgjithshëm i këtij institucioni, Mark Redmond. Kurti rikujtoi se aplikimi i Kosovës është dorëzuar më 15 dhjetor 2022, gjatë presidencës çeke, ndërsa që nga ajo kohë kanë kaluar tetë presidenca të tjera të BE-së. “Irlanda është presidenca e tetë që nga ajo kohë dhe ne ende mbetemi i vetmi vend në Ballkanin Perëndimor pa status kandidati. Ne kurrë nuk kemi kërkuar trajtim të veçantë, vetëm trajtim të barabartë”, theksoi Kurti, duke nënvizuar përkushtimin e vendit për t’u integruar në familjen evropiane. Kryeministri argumentoi se Kosova është e linjëzuar plotësisht me politikat e jashtme dhe ato të sigurisë të BE-së, duke përfshirë mbështetjen për Ukrainën dhe sanksionet ndaj Rusisë. Për më tepër, ai përmendi progresin ekonomik të vendit, me një rritje mesatare vjetore prej mbi katër për qind gjatë dekadës së fundit. Në fjalimin e tij, Kurti shprehu shqetësimin për moszbatimin e pesë marrëveshjeve të Procesit të Berlinit. Ai sugjeroi që mosmarrëveshjet dypalëshe të trajtohen në një kapitull të veçantë të procesit të anëtarësimit, në mënyrë që ato të mos shërbejnë si pengesë për përparimin e Kosovës në fusha të tjera kyçe. Siguria ishte një tjetër pikë e rëndësishme e fjalimit të tij. Duke iu referuar sulmit terrorist në Banjskë (24 shtator 2023) dhe sulmit ndaj infrastrukturës në Varagë (29 nëntor 2024), Kurti paralajmëroi për qasjen agresive të fqinjit verior. Sipas tij, vendosja e përgjegjësisë është jetike për drejtësinë dhe për parandalimin e kërcënimeve të ardhshme. Kurti shprehu mirënjohjen ndaj Irlandës për njohjen e pavarësisë së Kosovës në vitin 2008 dhe kërkoi mbështetjen e vazhdueshme të saj në proceset integruese. Kjo vizitë përmbylli një javë intensive diplomatike, e cila nisi me Forumin e Paqes në Paris dhe vijoi me samitin e Komunitetit Politik Evropian në Dublin, ku Kurti u prit nga kryeministri irlandez, Micheál Martin. Lidhur me zhvillimet politike në Serbi, ai vlerësoi se është ende herët për të folur për një kapitull të ri në marrëdhëniet mes dy vendeve.