Vala e të ftohtit arktik në Kosovë zgjat pak: Çfarë pritet të ndodhë gjatë fundjavës?

Kosova është përfshirë nga një rënie e ndjeshme e temperaturave pas depërtimit të një fronti të ftohtë ajror, duke sjellë një atmosferë që paralajmëron afrimin e stinës së dimrit. Ky ndryshim i menjëhershëm i motit erdhi si pasojë e largimit të ciklonit 'Charles', i cili la pas reshje shiu në veri të Shqipërisë dhe në disa zona të vendit tonë. Megjithatë, ky episod i motit të acartë do të jetë kalimtar. Nën ndikimin e fuqishëm të masave ajrore nga Atlantiku dhe Mesdheu, i ftohti nuk pritet të zgjasë më shumë se 24 orë. Stabiliteti atmosferik do të jetë i brishtë, pasi që nga dita e diel, masat e ngrohta mesdhetare do të rikthehen mbi rajon. Sipas parashikimeve, gjatë pasdites dhe mbrëmjes së të dielës, vranësirat do të dominojnë sërish, duke sjellë reshje të reja shiu në territorin e Kosovës dhe Shqipërisë. Ky ndryshim do të shoqërohet edhe me një rritje të temperaturave, duke zhdukur përkohësisht ndjesinë e dimrit të hershëm. Për momentin, qytetarët nuk duhet të presin një periudhë të gjatë me temperatura të ulëta apo reshje bore. Sinoptikanët bëjnë me dije se nuk ka ende shenja për një valë të mirëfilltë dimërore, ndaj reshjet e dëborës mbeten një fenomen që do të kërkojë ende kohë për t'u shfaqur seriozisht.