Analisti Meçe hedh akuza të forta: Berisha dhe Veliaj janë bërë bashkë në një skenar për grusht shteti

Analisti Arben Meçe ka hedhur dritë mbi zhvillimet e fundit politike, duke u fokusuar veçanërisht te thirrja e liderit të Partisë Demokratike, Sali Berisha, drejtuar kryebashkiakut Erion Veliaj, pas lëvizjeve të fundit të kryeministrit Edi Rama ndaj këtij të fundit. Në një analizë për emisionin “News Hour”, Meçe e ka cilësuar këtë qasje të Berishës si një përpjekje për të nxitur diversion politik. Sipas analistit, ekziston një pakt i heshtur mes Berishës dhe Veliajt, të cilin ai e ka përkufizuar si një aleancë të ndërtuar mbi bazën e një tentative për grusht shteti, e cila, sipas tij, tashmë ka rezultuar e dështuar. Duke analizuar qëndrimet e Elisa Spiropalit, Meçe vuri në dukje se Berisha është plotësisht i vetëdijshëm për pozicionimin e saj. Pavarësisht përplasjeve të brendshme që mund të ketë pasur me kryeministrin Rama, Spiropali ka konfirmuar në mënyrë të përsëritur në Parlament se kundërshtari i saj kryesor mbetet Berisha dhe se ajo nuk ka ndërmend të shkëputet nga Partia Socialiste. “Berisha është mjeshtër i diversionit, por është e qartë se mes tij dhe Veliajt ka pasur një aleancë në funksion të atyre ngjarjeve që mund të cilësohen si grusht shteti. Megjithatë, kjo strategji e tyre nuk ka arritur të finalizohet me sukses”, theksoi Meçe gjatë intervistës së tij.