Menduh Thaçi: Ligji për gjuhët kërkon buxhet prej 470 milionë eurosh dhe qasje reale në sportele

Kryetari i Partisë Demokratike Shqiptare (PDSH), Menduh Thaçi, ka trajtuar sfidat e zbatimit të Ligjit për përdorimin e gjuhëve në Maqedoninë e Veriut, duke vënë theksin te nevoja për mbështetje reale buxhetore dhe funksionalizim të plotë institucional. Sipas kreut të PDSH-së, serioziteti i këtij ligji dëshmohet vetëm në momentin kur ekzekutivi ofron një plan të detajuar financiar. Ai theksoi se Ministria e Financave duhet të prezantojë një strategji të qartë mbulimi fondesh për këtë çështje. “Ligji për përdorimin e gjuhës shqipe, për mua, do të jetë serioz atëherë kur ta shoh planin financiar për realizimin e tij nga ana e Ministrisë së Financave”, u shpreh Thaçi gjatë fjalës së tij. Lideri i PDSH-së bëri të ditur se, bazuar në llogaritjet e ekspertëve të partisë që ai drejton, për zbatimin rrënjësor të këtij ligji nevojitet një shifër prej afër 470 milionë eurosh. Ky investim financiar, sipas tij, është jetik për mbulimin e disa aspekteve kyçe. Buxheti i propozuar parashikon mbulimin e shpenzimeve për aftësimin dhe shkollimin e stafit profesional, organizimin e trajnimeve e seminareve, si dhe përgatitjen e dokumentacionit zyrtar, ku përfshihen diplomat, vulat dhe nevojat e tjera administrative. “Sipas analizave të bëra nga ekspertët e PDSH-së, nevojiten 470 milionë euro për implementimin e këtij ligji. Kjo përfshin përgatitjen dhe shkollimin e kuadrove, seminaret, diplomat, vulat dhe të gjitha nevojat e tjera për personat që janë të përgatitur”, theksoi ai. Në fushën e shërbimeve publike, Thaçi kërkoi ndryshim rrënjësor në qasjen e administratës ndaj qytetarëve, duke kërkuar që komunikimi zyrtar dhe sportelet të jenë funksionale në të dyja gjuhët zyrtare. “Dhe po e përmbyll: duhet që edhe sporteli të funksionojë në dy gjuhë. Jo që unë, si shqiptar, të flas në dy gjuhë”, përfundoi deklaratën e tij kryetari i PDSH-së, Menduh Thaçi.