Rama thirrje socialistëve: Koha për të zbritur në terren, pas dhunës në protestat opozitare

Kryeministri Edi Rama ka reaguar mbi valën e fundit të protestave, duke e vënë theksin te aktet e dhunshme që kanë shoqëruar këto tubime. Ai ka kritikuar përdorimin e gurëve dhe të bombave molotov, duke i cilësuar këto veprime si të paprecedenta në tre dekadat e fundit të demokracisë shqiptare. Gjatë fjalës së tij në Asamblenë Kombëtare të Partisë Socialiste, kreu i qeverisë vlerësoi se opozita e ka pasur mundësinë e plotë për të artikuluar qëndrimet e saj. Megjithatë, sipas tij, tashmë ka ardhur momenti që mazhoranca të ndryshojë qasje dhe të angazhohet në një dialog të drejtpërdrejtë me qytetarët në çdo cep të vendit. “I kanë thënë të tëra, i kanë ulëritur të tëra, i kanë shkruar gurët e bulevardit dhe kanë hedhur molotovët që nuk ishin hedhur në 35 vite liri. Por fjala jonë nuk është thënë akoma. Tani është koha të flasim ne, në çdo lagje dhe çdo fshat. Të flasim me çdo shqiptar që nuk i frikësohet dialogut”, deklaroi Rama para të pranishmëve. Në këtë kontekst, kryeministri prezantoi nismën “Prania Besnike”, një mekanizëm që synon të forcojë lidhjen me komunitetet dhe të identifikojë më nga afër problematikat e tyre, duke zgjeruar kështu shtrirjen politike të Partisë Socialiste në të gjithë territorin. Duke e vënë theksin te përgjegjësia qeverisëse, Rama nënvizoi se mandati aktual nuk duhet të trajtohet thjesht si një periudhë administrative katërvjeçare. Përkundrazi, ai e përkufizoi atë si një mision të ngarkuar nga populli, i cili kërkon llogaridhënie të vazhdueshme dhe prezencë aktive pranë njerëzve. “Një mandat si ky nuk është një mandat katërvjeçar i radhës, është një mision i ngarkuar nga një popull i tërë dhe nuk zhbëhet dot nga askush. Është një mision, jo një e drejtë për të mos dhënë shpjegime kur njerëzit i kërkojnë dhe aq më pak një e drejtë për të mos qenë te njerëzit më shumë se sa çdo herë më parë”, përfundoi kreu i ekzekutivit.