Kampionati i volejbollit: Partizani mposht Vllazninë pas një sfide të fortë në “Asllan Rusi”

Kategoria e Parë e volejbollit për meshkuj ka hapur siparin e javës së shtatë të kampionatit mbrëmjen e së premtes, ku Partizani dhe Vllaznia janë përballur në pallatin e sportit “Asllan Rusi”. Skuadra e drejtuar nga trajneri Ylli Tomorri ka siguruar një fitore me rezultatin 3-1, në përfundim të një takimi spektakolar që zgjati saktësisht dy orë e dy minuta. Ndeshja ka prodhuar rivalitet të lartë në parket, falë edhe paraqitjes së skuadrës shkodrane, e cila udhëtoi drejt kryeqytetit me synimin e qartë për të shkaktuar surprizën. Të kuqtë e nisën më mirë takimin duke fituar setin e parë me shifrat 25-22, por sfida u tensionua në të dytin, i cili u vendos vetëm pas pikëve shtesë, duke u takuar Vllaznisë me rezultatin 25-27. Ekuilibri vazhdoi edhe në setin e tretë, i cili dhuroi një seri të gjatë barazimesh deri në shifrat 14-14. Më pas, kampionët në fuqi morën frenat e lojës në dorë, duke e mbyllur setin në favor të tyre 25-20 dhe duke rimarrë epërsinë 2-1. Seti i katërt pati një tjetër rrjedhë, me Partizanin që dominoi qartësisht në fushë, duke fituar 25-16 dhe duke vulosur suksesin e përgjithshëm 3-1. Në radhët e të kuqve, kontributin kryesor në sulm e dhanë Tyler Funk me 26 pikë, Norgen Baruti me 18, Lusian Krasniqi me 15 dhe Krist Martiro me 13 pikë. Në krahun tjetër, paraqitja e Daniel Guerrerës me 25 pikë dhe e Gilman Talanit me 14 pikë rezultoi e pamjaftueshme për të shmangur humbjen e Vllaznisë. Falë këtij rezultati, Partizani ngjitet përkohësisht në vendin e dytë të renditjes, ndërsa Vllaznia pozicionohet në vendin e pestë. Java e shtatë e kampionatit do të ulë siparin këtë të shtunë me dy takimet e radhës. Sfidat do të nisin në orën 16:00 në Korçë mes Skënderbeut dhe Tiranës, për të vijuar në orën 17:00 me duelin ndërmjet Elbasanit dhe Erzenit. Për këtë xhiro, skuadra kryesuese e Studentit do të qëndrojë pushim.