Inteligjenca zvicerane jep alarmin: Vendi ynë është kthyer në shesh veprimi për agjentët e huaj

Zvicra po përballet me një valë në rritje të aktiviteteve të spiunazhit ndërkombëtar, sulmeve në hapësirën kibernetike dhe rreziqeve në rritje nga radikalizimi i të rinjve në internet. Ky shqetësim është shprehur hapur nga Serge Bavaud, drejtori i Shërbimit Informativ të Konfederatës (NDB), gjatë një interviste dhënë me rastin e plotësimit të një viti në krye të këtij institucioni. Sipas kreut të inteligjencës zvicerane, shteti helvetik është shndërruar në një shënjestër kryesore për shërbimet e huaja sekrete, me një fokus të veçantë nga Rusia, Kina dhe Irani. Faktorë si qendra e fortë financiare, prania e organizatave ndërkombëtare, universitetet prestigjioze dhe ekonomia e zhvilluar e bëjnë Zvicrën tejet të lakmueshme për këto vende, të cilat po pozicionohen për përballjet e ardhshme ku epërsia teknologjike do të jetë përcaktuese. Gjatë bisedës, Bavaud bëri me dije se strukturat e huaja të spiunazhit po përpiqen t'i shmangen sanksioneve përmes krijimit të kompanive guaskë dhe ndërmjetësve, me qëllim eksportimin e makinerive me precizion të lartë nga Zvicra drejt vendeve të treta, siç është Kina. “Aty pajisjet mund të çmontohen dhe të rieksportohen në Rusi. Në fund, Moska mund të pajiset me makineri zvicerane që prodhojnë komponentë për dronë apo raketa”, ka theksuar Bavaud. Ai shtoi se NDB-ja, në bashkëpunim të ngushtë me aleatët ndërkombëtarë, po ndërmerr hapa intensivë për të ndërprerë këto linja furnizimi dhe për të ndërgjegjësuar bizneset vendase përmes nismave parandaluese. Bavaud po ashtu pranoi se agjencitë partnere të huaja po ushtrojnë presion të ndjeshëm ndaj Zvicrës që të mbajë një qëndrim më të rreptë karshi agjentëve rusë. Sipas tij, nëse kombet e tjera evropiane i identifikojnë dhe i dëbojnë spiunët, ndërsa Zvicra tregohet e pavendosur, vendi rrezikon të shndërrohet në një strehë logjistike dhe operacionale për sulme hibride ruse kundër Evropës, duke cënuar rëndë imazhin e saj. Megjithatë, ai sqaroi se kompetenca për dëbimin e diplomatëve të akuzuar për spiunazh i takon politikës, konkretisht Departamentit të Punëve të Jashtme, dhe jo shërbimit sekret. Sa i takon sigurisë së brendshme, Bavaud vuri në dukje se rreziku terrorist mbetet në nivele të larta, sidomos në periudhat e festave dhe gjatë hapjes së tregjeve tradicionale të Krishtlindjeve. Ai shpjegoi se rrjetet terroriste janë jashtëzakonisht aktive në rrjet, ku rekrutojnë dhe shtyjnë drejt radikalizmit të rinjtë. “Sot nuk ke më nevojë të udhëtosh drejt Sirisë për t’u radikalizuar – kjo mund të ndodhë në dhomën tjetër të shtëpisë, ndoshta bashkë me një mik”, u shpreh ai, duke kujtuar rastin e sulmit me thikë ndaj një hebreu ortodoks në Zürich nga një i mitur simpatizant i grupit terrorist ISIS. Identifikimi në kohë i këtyre “ujqërve të vetmuar”, të cilët shpesh joshen nga dhuna përmes platformave digjitale, mbetet ndër sfidat më madhore për sigurinë kombëtare. Në të njëjtën kohë, 53-vjeçari Serge Bavaud – i cili mban gradën e kolonelit në ushtrinë zvicerane dhe e drejton NDB-në që prej 1 nëntorit 2025, pas një karriere të gjatë në diplomaci dhe menaxhimin e situatave të krizës – njoftoi nga selia në Bernë përfundimin e procesit disa-vjeçar të ristrukturimit të këtij institucioni. Kjo strukturë e re, që do të nisë zbatimin në vitin 2027, parashikon zvogëlimin e trupës drejtuese nga gjashtë në katër anëtarë dhe ndarjen e shërbimit në katër shtylla kryesore: Qeverisje, Operacione, Burime dhe Siguri, si dhe Teknologji.