Nikolloski jep detajet: Autostrada Kërçovë-Ohër hapet plotësisht deri në maj

Punimet në autostradën Kërçovë-Ohër po zhvillohen me një ritëm mjaft të lartë, ndërsa segmenti nga fshati Izvor i Kërçovës deri te fshati Vërbjan në komunën e Debarcës pritet të lëshohet për qarkullim gjatë javëve në vijim. Ky njoftim u bë nga Ohri prej zëvendëskryeministrit dhe ministrit të Transportit, Aleksandar Nikolloski. “Ne po i përmbahemi plotësisht angazhimeve tona për të pasur jo vetëm një autostradë të hapur tërësisht deri në fund të muajit maj, por një infrastrukturë të pajisur me të gjitha lejet dhe dokumentacionin e nevojshëm, diçka që fatkeqësisht ka munguar në të kaluarën. Nga ana tjetër, pjesa më sfiduese që shtrihet nga fshati Izvor i Kërçovës deri në Vërbjan të Debarcës, pres të vihet në funksion shumë shpejt. Kjo pjesë ka përfunduar tërësisht në aspektin ndërtimor, gjë që vërehet qartë në terren”, u shpreh Nikolloski. Sipas ministrit, dy tubat e tuneleve në këtë aks janë hapur tashmë, ku më i shkurti ka një gjatësi prej 1.100 metrash, kurse më i gjati arrin në 1.990 metra, duke përbërë kështu tunelet më të gjata në vend. “Gjithashtu, katër galeritë në këtë segment, trupi i rrugës, urat dhe viaduktet janë plotësisht të ndërtuara, çka do të thotë se nga ana e punimeve ndërtimore gjithçka ka marrë fund. Aktualisht jemi duke zbatuar direktivën më të re evropiane për sigurinë në komunikacion, posaçërisht brenda tuneleve, përmes testeve të nevojshme për të arritur standardet më të larta të sigurisë. Është hera e parë që kjo direktivë evropiane zbatohet në vend dhe në gjithë rajonin, dhe pas përfundimit të këtyre provave, publiku do të ftohet të inspektojë dhe përdorë këtë segment”, shtoi ai. I pyetur mbi ecurinë e punimeve në autostradat që po ndërtohen nga konzorciumi “Behtel dhe Enka”, Nikolloski theksoi se përparimi më i madh vërehet në relacionin Prilep – Manastir. “Progresi ndryshon nga njëri segment në tjetrin. Për shembull, në aksin nga Tetova në Gostivar kemi arritur 65% të punimeve të dheut, ndërsa ende nuk ka asfalt në asnjërin prej tre nënsegmenteve. Në autostradën nga Gostivari në Bukojçan, pjesa që nis nga Gostivari ka mbërritur në 60% të punimeve, kurse aksi nga Bukojçani sapo ka nisur të ndërtohet. Ndërkaq, në segmentin Prilep – Manastir, punimet e dheut kanë kaluar shkallën e 80% të progresit”, deklaroi ai. Sa i përket projektit për autostradën Trebenishtë – Qafë Thanë, Nikolloski bëri të ditur se janë duke u zhvilluar bisedime intensive me kontraktorin “Behtel dhe Enka” për të gjetur zgjidhjen më optimale që mbron interesat e gjithë rajonit të Ohrit, Strugës dhe më gjerë. “Jemi duke bashkëbiseduar me kontraktorin për të gjetur trasenë më të përshtatshme që respekton statusin e të gjithë zonës, dhe pres që me nisjen e sezonit të ndërtimit të kemi tashmë aktivitet në terren”, tha ai. Në lidhje me vendimmarrjen për trasenë e saktë nga Trebenishti deri në Qafë Thanë, Nikolloski theksoi se kjo çështje do t'i lihet në dorë ekspertëve. “Unë personalisht nuk do të ndërhyj, pasi paraardhësit në poste të ngjashme kanë bërë gabime të tilla. Ne jemi politikanë që marrim vendime mbi bazën e raporteve profesionale. Vlerësoj se një vendim i tillë i takon ekspertëve”, përfundoi Nikolloski.