Inovacion për pakicat në Kosovë: Kryeministri Kurti lanson platformën digjitale për grante dhe punësim

Kryeministri i Republikës së Kosovës, Albin Kurti, ka marrë pjesë në ngjarjen e zyrtarizimit të Platformës për Çështje të Komuniteteve, një nismë e realizuar nga IOM-i përgjatë vitit 2024, e cila është mbështetur financiarisht dhe logjistikisht nga Mbretëria e Bashkuar dhe Zvicra. Gjatë fjalës së tij hapëse, kreu i ekzekutivit theksoi se kjo hapësirë digjitale shërben si një pikë e vetme referimi për banorët e të gjitha komuniteteve joshumicë në vend, duke përfshirë serbët, boshnjakët, turqit, romët, ashkalinjtë, egjiptianët, goranët, si dhe malazezët dhe kroatët. “Së pari, ofron informata për politikat e Qeverisë, si dhe për mundësitë më të fundit për grante, subvencione, punësim, trajnime dhe punë praktike dhe, e dyta, u mundëson qytetarëve ta raportojnë drejtpërdrejt diskriminimin, duke krijuar kësisoj komunikim të dyanshëm ndërmjet Qeverisë dhe komuniteteve”, u shpreh ndër të tjera kryeministri Kurti.