Eksperti politik: Kosova duhet ta mbajë Banjskën në fokusin global dhe të kërkojë llogaridhënie nga Beogradi

Analisti politik Ali Hertica ka vlerësuar se prania e kryeministrit të Kosovës, Albin Kurti, në Forumin e Paqes në Paris, thekson domosdoshmërinë e përfaqësimit të vendit në rrafshin ndërkombëtar, avancimin e procesit të njohjeve, mbajtjen e Serbisë përgjegjëse për agresionin në Banjskë, si dhe peshën që ka dialogu në stabilitetin e rajonit. Sipas tij, ky aktivitet ndërkombëtar shërben si një platformë e rëndësishme për nxitjen e bashkëpunimit global dhe multilateralizmit, duke krijuar mundësi që Kosova të ekspozojë sfidat e saj në rrafshin e sigurisë dhe politikës, sidomos përmes temës qendrore “Nga sovraniteti te bashkëpunimi”. Hertica ka nënvizuar se trupi diplomatik kosovar nuk duhet të ndalet së punuari me pesë vendet mosnjohëse të Bashkimit Evropian, megjithëse nuk parashikon që ky ngërç të bëhet pengesë e pakapërcyeshme për integrimin euroatlantik të vendit. “Nuk mendoj se pesë shtetet e Bashkimit Evropian që ende nuk e kanë njohur Kosovën do ta pengojnë domosdoshmërisht rrugën e saj drejt integrimit evropian. Këtë e kemi parë edhe në rastin e Marrëveshjes së Stabilizim-Asociimit, kur këto shtete ishin pajtuar me nënshkrimin e saj, pavarësisht se nuk e njihnin pavarësinë e Kosovës”, u shpreh ai, duke shtuar se për sukses nevojitet diplomaci aktive dhe koordinim me aleatët. Duke analizuar kërkesat për llogaridhënie lidhur me ngjarjet e Banjskës dhe dorëzimin e Milan Radoiçiqit, njohësi i çështjeve politike e ka cilësuar këtë si një ndër dosjet më delicate mes Prishtinës dhe Beogradit. Ai ka shtuar se edhe pse Gjykata Themelore në Prishtinë ka dhënë dënime në shkallë të parë për tre nga të akuzuarit, kjo mbetet vetëm një pjesë e drejtësisë, pasi aktakuza ngarkon drejtpërdrejt shtetin serb si sponzor të sulmit. “Problemi qëndron te fakti se Kosova mund t'i gjykojë dhe dënojë pjesëtarët e grupit të armatosur, ndërsa organizatori i dyshuar, Milan Radoiçiq, dhe përgjegjësia e pretenduar e shtetit serb mbeten jashtë juridiksionit të institucioneve kosovare”, theksoi Hertica. Në këtë kuadër, ai ka kritikuar ashpër mungesën e vullnetit nga Serbia për të bashkëpunuar dhe për të vënë përpara drejtësisë personat që strehohen në territorin e saj, duke bërë thirrje që institucionet e Kosovës ta freskojnë vazhdimisht agjendën ndërkombëtare rreth këtij rasti.