E gjithë Prishtina nën ethet e kuqezinjve: Kosova synon triumfin vendimtar ndaj Izraelit në “Fadil Vokrri”

Kryeqyteti është veshur sot me ngjyrat e futbollit, ndërsa vëmendja e opinionit sportiv është e përqendruar te stadiumi “Fadil Vokrri”, ku Kombëtarja e Kosovës do të masë forcat me Izraelin në një duel vendimtar për fatet e tyre në Ligën e Kombeve. Përfaqësuesja kosovare do të nisë sfidën në orën 15:00, me objektivin e vetëm: marrjen e tri pikëve të plota, të cilat do të garantonin zyrtarisht ruajtjen e vendit në Ligën B. Për këtë takim sfidues, trajneri Franco Foda ka përzgjedhur një grup prej 23 lojtarësh, ndërkohë që në listën përfundimtare nuk ka mundur të përfshihet 18-vjeçari i Stuttgartit, Enis Rexhepi. Në aspektin e sigurisë, Policia e Kosovës ka ndërmarrë masa konkrete përmes një plani të detajuar operativ, duke njoftuar qytetarët për bllokime dhe ndryshime të përkohshme në qarkullimin rrugor gjatë ditës së sotme. Në kampin e mbështetësve sundon besimi i plotë te suksesi. Një prej tifozëve të pranishëm ka shprehur bindjen e tij se “Dardanët” do t'ia dalin me sukses, duke parashikuar një fitore të pastër prej 2-0. "Unë po mendoj që ka me fitu Kosova sot me rezultat 2 me 0. Pritshmëritë e mia për lojtarët e Kosovës janë shumë të larta, sidomos për Edon Zhegrovën edhe Fisnik Asllanin, edhe po shpresoj që kemi me fitu për sot. Po mendoj që ka me shënu një gol Muriqi me kry, edhe një ka me shënu Edon Zhegrova", u shpreh ai. Pas përfundimit të këtij takimi, përfaqësuesja e Kosovës do t'i japë fund fazës së grupeve më 17 nëntor, kur do të udhëtojë për t'u ndeshur në transfertë kundër Irlandës.