Synimi madhor i socialistëve, Balla: Në maj të 2027-ës hyjmë për t'i fituar të gjitha bashkitë

Partia Socialiste ka përcaktuar tashmë strategjinë e saj për zgjedhjet vendore që do të mbahen më 9 maj 2027, ku synimi kryesor mbetet triumfi në të gjitha njësitë vendore të vendit. Gjatë punimeve të Asamblesë Socialiste, drejtuesi politik vuri theksin te rëndësimi i procesit të përzgjedhjes së figurave që do të garojnë për drejtimin e bashkive. Sipas Taulant Ballës, profili i kandidatëve të ardhshëm nuk duhet të shihet vetëm përmes prizmit të zgjedhjeve të vitit 2027, por ai duhet të shërbejë gjithashtu si një mekanizëm kyç edhe për suksesin në zgjedhjet e ardhshme parlamentare të vitit 2029. “Duhet t’i shohim kandidatët për kryetarë bashkie në 2027, në funksion të fitores së zgjedhjeve edhe në 2029. Kryetarët e bashkive duhet të jetojnë 24 orë në komunitetet përkatëse, jo ta drejtojnë bashkinë nga Tirana. Të bëjmë një proces të mirë përzgjedhës për Tiranën dhe të kandidojmë atë që na maksimizon rezultatin. Na duhet të merremi edhe me betejën digjitale, për këtë na duhet të kemi një organizim më të mirë. Partia Socialiste konkurron me objektivin e fitores së 46 bashkive”, u shpreh Balla gjatë fjalës së tij. Vlen të theksohet se, si pasojë e përditësimit të hartës dhe ndarjes së re administrativo-territoriale, qytetarët shqiptarë në procesin e ardhshëm zgjedhor do të votojnë për të zgjedhur drejtuesit e 46 bashkive, ndryshe nga struktura e deritanishme që numëronte 61 të tilla.