Sfidat e reja të PS-së për 2027-ën, Balla lëshon mesazhin e fortë nga Asambleja: Mjaft me drejtimin e bashkive nga Tirana

Partia Socialiste ka nisur zyrtarisht fazën e përgatitjeve për zgjedhjet vendore të vitit 2027, të cilat do të shërbejnë edhe si sprovë për zgjedhjet parlamentare të vitit 2029. Gjatë mbledhjes me dyer të mbyllura të Asamblesë Kombëtare, kreu i Grupit Parlamentar të kësaj force politike, Taulant Balla, ka parashtruar disa direktiva kyçe për organizimin e brendshëm dhe strukturën e ardhshme drejtuese. Duke u ndalur te kriteret e përzgjedhjes së kandidatëve, Balla ka kërkuar një angazhim maksimal nga terreni, duke u dhënë fund praktikave ku drejtuesit vendorë ushtrojnë funksionet e tyre nga kryeqyteti. Gjithashtu, ai ka vënë theksin te rëndësia e fushatës digjitale dhe ka zyrtarizuar objektivin madhor të socialistëve për të siguruar fitoren në 46 bashki të vendit. Në fjalën e tij para strukturave, Taulant Balla u shpreh: “Duhet t’i shohim kandidatët për kryetarë bashkie në 2027, në funksion të fitores së zgjedhjeve edhe në 2029. Kryetarët e bashkive duhet të jetojnë 24 orë në komunitetet respektive. Jo të drejtojnë bashkinë nga Tirana. Të bëjmë një proces të mirë përzgjedhës për Tiranën dhe të kandidojmë atë që na maksimalizon rezultatin. Na duhet të merremi dhe me betejën digjitale, për këtë duhet të kemi një organizim më të mirë. Partia Socialiste konkurron me objektivin e fitores së 46 bashkive”.