Tragjedia në Klinë: Prokuroria nis hetimet për vdekjen e pacientes pas ndërhyrjes mjekësore

Prokuroria Themelore në Pejë ka ndërmarrë hapat zyrtarë hetimorë për të zbardhur rrethanat e vdekjes së një qytetareje, e cila ndërroi jetë menjëherë pasi ishte trajtuar në Qendrën Kryesore të Mjekësisë Familjare (QKMF) në Klinë. Lajmin për nisjen e hetimeve e ka konfirmuar zëdhënësi i këtij institucioni akuzues, Shkodran Nikçi. Sipas tij, prokurorja kompetente e Departamentit për Krime të Rënda ka ngarkuar Policinë e Kosovës me detyrën e sigurimit të dokumentacionit mjekësor dhe marrjes në pyetje të personelit shëndetësor të përfshirë në rast. "Me urdhër të Prokurorit të Shtetit, trupi i pajetë i viktimës është dërguar në Institutin e Mjekësisë Ligjore (IML) për autopsi, me qëllim të përcaktimit të shkakut të vdekjes dhe ndërmarrjes së mëtejshme të veprimeve ligjore", ka deklaruar Nikçi në përgjigjen e tij zyrtare. Ndërkohë, drejtuesit e QKMF-së në Klinë kanë dalë me një sqarim publik lidhur me ngjarjen, ku kanë bërë të ditur se gjatë kohës që pacientes i është administruar terapia me infuzion, ajo ka shfaqur papritur një reaksion alergjik.