Eksperienca dhe spektakli i futbollit amator: Mbyllet java e dytë e 'FSHF Sunday League 9×9'

Kampionati i futbollit amator, FSHF Sunday League 9×9, ka ulur siparin e javës së dytë, duke sjellë përballje dinamike, emocione të forta dhe një numër të lartë golash në të dyja grupet konkurruese, A dhe B. Në Grupin A, tifozët patën mundësinë të shijojnë ndeshje mjaft të luftuara dhe rezultate surprizë. Skuadra M&D triumfoi me shifrat 4-2 ndaj FC Tigres, ndërsa FC Krypton mori një fitore të ngushtë por të rëndësishme 1-0 përballë Albamer. Tri pikët e radhës u siguruan gjithashtu nga Elso, North Gate dhe Jata Market. Ndërkohë, sfida mes FC Vibes dhe ATS nuk prodhoi gola duke u mbyllur në barazim, ndërsa përballja më spektakolare e kësaj jave rezultoi ajo mes 111 Complex dhe FC Domja, e cila u mbyll me barazimin 4-4. Edhe Grupi B u karakterizua nga ritmi i lartë dhe sfida me shumë gola. Vila-L MFC shkëlqeu në fushë duke mposhtur thellësisht 8-0 K.F. Bulqiza 9×9, ndërsa Matrix FC regjistroi një fitore bindëse 7-3 kundër FB Passion. Sukses në këtë javë arritën edhe Primo MFC, Dymbëdhjeta, Barrikada dhe Antigonean. Një nga takimet më të tensionuara dhe interesante ishte ai mes FC Luminesen dhe Three Lions 9×9, ku të parët dolën fitues me rezultatin 3-2. Rezultatet e plota të ndeshjeve të Grupit A flasin për një garë të fortë: FC Tigres – M&D 2-4, FC Vibes – ATS 0-0, FC Krypton – Albamer 1-0, Dragons – Elso 0-1, 111 Complex – FC Domja 4-4, North Gate – Coca Cola Tepelena 3-0, si dhe FC Anuar Construction – Jata Market 1-5. Nga ana tjetër, sfida e Grupit B regjistroi këto rezultate: Primo MFC – Legjendat TT 4-1, IMMI – Dymbëdhjeta 0-1, K.F. Bulqiza 9×9 – Vila-L MFC 0-8, Barrikada – FC Implant Swiss 2-1, Sons 9×9 – Antigonean 2-5, Matrix FC – FB Passion 7-3, si dhe Three Lions 9×9 – FC Luminesen 2-3. FSHF Sunday League 9×9 është drejt kalendarit të javës së tretë, duke dëshmuar se ky sezon po kthehet në një pikë takimi për pasionin ndaj futbollit amator dhe promovimin e një jetese aktive sportive.