Pengesë për qytetarët nga Likova: Refuzohen lejet e parkimit për personat me aftësi të kufizuara në Kumanovë

Për shkak të nevojave jetike, si vizitat mjekësore apo marrja e shërbimeve sociale, banorët e Likovës dhe të Staro Nagoriçanit detyrohen të udhëtojnë drejt Kumanovës. Megjithatë, për disa qytetarë me aftësi të kufizuara nga Likova, vendbanimi i tyre është shndërruar në një barrierë administrative për të siguruar leje parkimi me kushte të lehtësuara. Ky shqetësim është ngritur nga këshilltari i AKI-së, Isuf Seferi, i cili bëri të ditur se këtë vit kërkesat e tyre janë hedhur poshtë vetëm pse nuk figurojnë si banorë të Komunës së Kumanovës. Kjo temë u trajtua gjatë seancës së 20-të të Këshillit të Komunës së Kumanovës, teksa po diskutoheshin ndryshimet në programin e punës dhe në planin financiar për vitin 2026 të ndërmarrjes publike “Kumanova – Parking”. Duke iu përgjigjur kësaj problematike, kryetarja e Këshillit, Ivana Gjeorgjievska, së bashku me këshilltaren e ZNAM-it, Monika Markovska, sugjeruan që zgjidhja institucionale të arrihet përmes një bashkëpunimi ndërkomunal. Seferi theksoi se ishte vënë në kontakt nga vetë qytetarët e prekur nga komunat përreth, të cilët në vitet e kaluara kishin gëzuar të drejtën e parkimit të lehtësuar, kurse tashmë janë përballur me refuzimin për shkak të kritereve të vendbanimit. “Qytetarët e Likovës dhe të Staro Nagoriçanit nuk vijnë në qytetin tonë për luks, por për nevoja elementare dhe jetike. Ata vijnë këtu për të shkuar në Spitalin e Përgjithshëm, në Qendrën për Punë Sociale dhe në institucione shtetërore që nuk ekzistojnë në komunat e tyre”, u shpreh Seferi. Edhe pse nuk pati mundësi të dorëzonte një nismë zyrtare në kohë, ai kërkoi angazhim për t'i dalë në ndihmë këtij grupi, numri i të cilit nuk është i lartë, por që ndihma do të kishte ndikim të ndjeshëm në buxhetin e tyre familjar. Në fjalën e saj, Gjeorgjievska shpjegoi se fondet që Këshilli i Kumanovës ia ndan ndërmarrjes “Kumanova – Parking” funksionojnë si subvencione komunale. Ajo hodhi idenë që edhe komunat e Likovës dhe Staro Nagoriçanit të marrin përsipër pjesën e tyre financiare për këto lehtësira, duke njoftuar se do të ftojë në një takim zyrtar kryetarin e Këshillit të Komunës së Likovës. “Këto çështje zgjidhen përmes bashkëpunimit ndërkomunal. Ashtu siç mund të ndajë mjete Këshilli i Komunës së Kumanovës, mund të ndajnë edhe këshillat e Likovës dhe të Staro Nagoriçanit”, deklaroi Gjeorgjievska, duke shtuar se pavarësisht kapaciteteve të kufizuara të parkingjeve, Kumanova ka hapësirë për t'u dalë në ndihmë këtyre vizitorëve. Një qëndrim të ngjashëm ndau edhe këshilltarja Markovska, e cila insistoi mbi një pakt zyrtar ndërmjet vetëqeverisjeve lokale për të garantuar qasje më të lehtë për qytetarët e komunave fqinje, ku edhe kostot të ndahen proporcionalisht. “I ftoj drejtuesit dhe këshillat e Likovës dhe të Staro Nagoriçanit që të dakordohemi për një model të përbashkët dhe secila komunë të marrë pjesë në mbulimin e shpenzimeve për banorët e vet”, u shpreh ajo. Nga ana e tij, këshilltari i ZNAM-it, Darko Mitevski, konfirmoi konsensusin mes anëtarëve të Këshillit se shtimi i fondeve për parkim të lehtësuar për personat me aftësi të kufizuara është plotësisht i arsyetuar. Mitevski gjithashtu dha mbështetjen e tij për rritjen e subvencioneve që dedikohen për programet mësimore, jashtëmësimore dhe sportive në pishinën e mbuluar të qytetit. Pasi e vlerësoi këtë nismë afatgjatë si një projekt të suksesshëm, ai shtoi se mjetet financiare shërbejnë edhe për mbulimin e shpenzimeve operative të pishinës, duke përfshirë pagat e punonjësve, faturat e ujit, përdorimin e reagentëve, si dhe analizat e rregullta kimike dhe bakteriologjike të ujit.