Masat e rrepta të sigurisë: Policia e Kosovës gati për ndeshjen Kosovë–Izrael

Për të garantuar një mjedis të sigurt gjatë ndeshjes ndërkombëtare të Ligës së Kombeve në futboll mes Kosovës dhe Izraelit, e cila do të luhet sot në orën 15:00 në Prishtinë, Policia e Kosovës ka hartuar dhe po zbaton një plan të detajuar operativ. Sipas autoriteteve policore, masat e sigurisë kanë nisur që në momentin e mbërritjes së kombëtares mysafire në vendin tonë. Ato përfshijnë eskorta mbrojtëse dhe sigurim të plotë përgjatë gjithë itinerarit të lëvizjes dhe qëndrimit të delegacionit izraelit. Këto masa do të jenë në fuqi edhe gjatë ditës së sotme, kohë në të cilën do të ketë bllokime apo ndërprerje të përkohshme të qarkullimit rrugor gjatë kalimit të eskortës zyrtare. Për këtë arsye, drejtoria e policisë u bën thirrje qytetarëve dhe shoferëve për mirëkuptim dhe përshtatje me situatën në trafik. Operacioni i sigurisë po zhvillohet në bashkëpunim të ngushtë dhe koordinim të vazhdueshëm me Federatën e Futbollit të Kosovës (FFK), për të garantuar mbarëvajtjen para, gjatë dhe pas përfundimit të këtij eventi sportiv. Në përputhje me udhëzimet e FFK-së, kujtohet se tifozët duhet të mbërrijnë në stadium në kohë, të shmangin futjen e sendeve dhe mjeteve të palejuara apo të rrezikshme, si dhe të kenë me vete biletat dhe dokumentet e identifikimit për të kaluar kontrollin në hyrje. “Policia e Kosovës, në zbatim të detyrave dhe autorizimeve ligjore, do të kujdeset për ruajtjen e rendit dhe sigurisë publike, ofrimin e sigurisë dhe parandalimin e çfarëdo incidenti të mundshëm”, thuhet në nomimin zyrtar. Përveç bashkëpunimit me FFK-në, forcat e rendit do të bashkëpunojnë ngushtë edhe me agjencitë private të sigurimit. Ndërkohë, qytetarët falënderohen për kontributin e tyre në ruajtjen e qetësisë dhe ftohen që për çdo çështje apo dyshim të njoftojnë menjëherë autoritetet përmes numrit të emergjencës 192.