Jorida Tabaku: Paraja e pistë po shkatërron tregun dhe po pamundëson blerjen e banesave për shqiptarët

Deputetja e Partisë Demokratike, Jorida Tabaku, ka ngritur alarmin mbi ndikimin shkatërrimtar të pastrimit të parave në ekonominë shqiptare. Përmes rubrikës së saj “Këndi i Fundjavës”, ajo theksoi se depërtimi i kapitalit me burime të dyshimta po krijon një pabarazi të rrezikshme, duke dëmtuar rëndë bizneset e ndershme dhe duke u mbyllur dyert e shtëpive të rinjve e familjeve shqiptare. Në kuadër të diskutimeve për paketën fiskale dhe buxhetin e vitit 2027, Tabaku vuri në dukje se ndërsa sipërmarrësit e ligjshëm përballen me barrë fiskale dhe pasiguri të vazhdueshme, kapitali kriminal po hyn në treg pa asnjë pengesë. Sipas saj, kjo krijon një terren të pabarabartë ku biznesi që paguan taksa detyrohet të konkurrojë me para që nuk e kanë qëllim fitimin, por thjesht legalizimin e pasurisë. Deputetja shpjegoi se një sipërmarrës i ndershëm duhet të shlyejë kreditë, interesat bankare dhe pagat e punonjësve, ndërsa kapitali i paligjshëm është i gatshëm të operojë edhe me humbje për të fshehur gjurmët e krimit. Kjo dinamikë, sipas Tabakut, ka ndikuar drejtpërdrejt në rritjen artificiale të çmimeve të pasurive të paluajtshme, duke e kthyer apartamentin nga një nevojë jetike për familjen në një mjet për pastrimin e parave. Një tjetër pikë kritike e analizës së saj ishte zhvlerësimi i euros, i cili po godet rëndë familjet që mbështeten tek remitancat dhe eksportuesit vendas. Tabaku hodhi poshtë narrativën qeveritare se forcimi i lekut është tregues i suksesit, duke argumentuar se ekonomia duhet të mbështetet mbi prodhimin real dhe produktivitetin, jo mbi lëvizjet e pashpjeguara të monedhës. Duke e akuzuar ekzekutivin për një “ortakëri të pandershme” me krimin, Tabaku kërkoi që institucionet të ndalin standardet e dyfishta. Ajo theksoi se një qeveri që ushtron presion mbi bizneset për çdo transaksion, ka për detyrë të kërkojë llogari edhe për origjinën e çdo investimi të dyshimtë në vend. Në përfundim, deputetja kërkoi një analizë të thelluar dhe të dokumentuar të flukseve valutore, si dhe masa konkrete për të luftuar pastrimin e parave. Për Tabakun, kjo betejë është thelbësore për mbrojtjen e punës së ndershme, nxitjen e investimeve të shëndosha dhe krijimin e mundësive reale që të rinjtë të ndërtojnë të ardhmen e tyre në Shqipëri.