Moti i keq në Kukës: Reshjet e shiut sjellin bllokime të pjesshme rrugore dhe ndërprerje të energjisë

Qarku i Kukësit është përfshirë nga reshje shiu me intensitet të ulët, të cilat kanë krijuar disa vështirësi në qarkullimin rrugor për shkak të rënies së gurëve dhe inerteve në disa segmente nacionale. Autoritetet përkatëse dhe subjektet kontraktore janë në terren duke vijuar ndërhyrjet për pastrimin e akseve, me qëllim garantimin e lëvizjes normale të mjeteve. Sipas të dhënave zyrtare të përditësuara deri në orën 08:20, të gjitha rrugët nacionale mbeten të kalueshme, ndërsa nga bashkitë Kukës, Has dhe Tropojë nuk raportohen ngjarje të tjera emergjente. Sa i përket rrjetit të shpërndarjes së energjisë elektrike, furnizimi paraqitet kryesisht stabil, megjithëse disa zona rurale vijojnë të përballen me ndërprerje. Konkretisht, në Bashkinë Kukës pa drita janë fshatrat Krenxë, Nangë dhe Bushat në Njësinë Administrative Bicaj. Në territorin e Bashkisë Has, problemet me energjinë prekin fshatrat Kishaj dhe Pogaj (Njësia Administrative Gjinaj), si dhe fshatrat Cahan dhe Mujaj (Njësia Administrative Qytet Krumë). Ndërkohë, në Bashkinë Tropojë, pa furnizim elektrik janë fshatrat Pac dhe Berishë të Njësisë Administrative Bytyç, si dhe pjesërisht Njësia Administrative Lekbibaj. Në anën tjetër, shërbimi i furnizimit me ujë të pijshëm në të gjithë qarkun po funksionon rregullisht, duke iu përmbajtur fashave orare të përcaktuara nga Drejtoria Rajonale e Ujësjellës-Kanalizimeve Kukës (DRUK).