Cardinale me synime të mëdha te Milan: Do të afroj lojtarët më të mirë në botë, klubi nuk është në shitje

Numri një i Milanit, Gerry Cardinale, ka shpalosur ambiciet e tij të qarta për të ardhmen e kuqezinjve, duke garantuar se do t'i sigurojë klubit kapacitetet e duhura ekonomike për të rivalizuar në tregun ndërkombëtar dhe për të afruar futbollistët më cilësorë në rruzull. Këto deklarata u bënë gjatë prezantimit zyrtar të 'Milan Sports&Entertainment', sipërmarrjes së re që do të administrojë të gjithë portofolin e biznesit të lidhur me gjigantin italian. Strategjia kryesore synon gjenerimin e të ardhurave të reja për të financuar merkaton dhe për të përballur me sukses superfuqitë financiare të Premier Ligës. Sipas tij, fokusi mbetet te rikthimi i lavdisë dhe trofeve, duke hedhur poshtë çdo aludim për një shitje të mundshme të klubit në të ardhmen. ‘Nuk do ta shes kurrë Milanin. Ky është një projekt për ta kthyer atë te fitoret, dhe unë nuk pranoj që kjo të kërkojë një kohë të gjatë. Qëllimi im është të fitoj tituj me vazhdimësi dhe sigurisht të rikthehemi në Ligën e Kampionëve’, theksoi Cardinale, duke vendosur theksin te prioriteti absolut që ka fusha e lojës. Në këtë optikë, menaxhimi i ekzibicioneve verore do të ndryshojë rrënjësisht, pasi fitimet e menjëhershme nuk do të jenë më prioritet para përgatitjes së skuadrës. Lëvizjet e verës do të kushtëzohen vetëm nga kërkesat e stafit teknik. ‘Do të vendosë trajneri. Nëse do të udhëtojmë, kjo do të ndodhë vetëm drejt Shteteve e Bashkuara, bazuar në atë që është më e mira për grupin. Ndeshjet miqësore jashtë vendit duhet t’i shërbejnë vlerës së shtuar të ekipit dhe jo për të arkëtuar 2 milionë euro për klubin. Këto shifra nuk janë më objektivi ynë, ndryshe nga praktikat e mëparshme të administratës së vjetër’, u shpreh ai. Në fjalën e tij, themeluesi i fondit u ndal edhe te iniciativa për projektin e basketbollit 'NBA Europe', duke konfirmuar ecurinë e tij pavarësisht mungesës së një marrëveshjeje me Evroligën. ‘Projekti do të nisë gjithsesi, megjithëse nuk do të ketë një akord me Euroleague. Ndoshta në fund të këtij viti ose në fillim të vitit 2027 do të bëhet publik grupi i parë me skuadrat e reja për Evropën, mbetet të shohim kohën e saktë. Ndërkohë, në San Donato zotërojmë tokën tonë dhe nëse na jepet drita jeshile për një ekip në Milano, jemi gati të nisim punimet menjëherë, pasi kemi tashmë autorizimin urbanistik për një arenë moderne me kapacitet prej 20 mijë vendesh’, përfundoi Cardinale.