Skenë surprizë në Prishtinë: Tentoi grabitjen e pompës së derivateve me thikë, në fund u tha punëtorëve se ishte shaka

Një ngjarje e pazakontë ka ndodhur në kryeqytet, ku një person i maskuar ka hyrë në një pikë karburanti në rrugën “Lidhja e Lezhës” në Prishtinë, duke tentuar të kryejë një grabitje me armë të ftohtë. Duke përdorur një thikë, ai ka kanosur dy punonjësit që ndodheshin në detyrë për t'i zhvatur para, mirëpo nuk ka arritur të përfundojë qëllimin e tij kriminal. Incidenti është regjistruar më 13 nëntor, rreth orës 21:37. Sipas informacioneve zyrtare të Policisë, pavarësisht kërcënimeve me thikë drejt dy punonjësve, i dyshuari nuk ka mundur të sigurojë asnjë shumë parash nga ky sulm. Pasi kuptoi se plani i tij dështoi, situata mori një kthesë absurde. Ai hoqi maskën nga fytyra dhe u tha punonjësve të pikës së derivateve se e gjithë kjo kishte qenë thjesht një shaka, për t'u larguar më pas nga vendi i ngjarjes. “Pas një kohe i dyshuari është paraqitë te zyrtarët policorë gjersa kanë qenë në vendin e ngjarjes nga i cili kanë konfiskuar thikën e cila dyshohet ishte përdorë në rast. Pas intervistimit, me urdhër të prokurorit i dyshuari është liruar në procedurë të rregullt”, bëri të ditur Policia. Pas përfundimit të procedurave të intervistimit dhe me vendim të prokurorit përgjegjës, i dyshuari është lënë i lirë, ndërsa çështja do të ndiqet tutje në procedurë të rregullt ligjore.