Pas incidentit fizik në Abu Dhabi, Merab Dvalishvili merr një vendim të papritur ndaj Usman Nurmagomedov

Pas një heshtjeje disa ditore, luftëtari i njohur Merab Dvalishvili ka reaguar publikisht lidhur me incidentin e rëndë ku u vu në shënjestër nga Usman Nurmagomedov dhe bashkëpunëtorët e tij në Abu Dhabi. Ish-kampioni i UFC-së në peshën bantamweight ka përcjellë një thirrje për pajtim, duke bërë të ditur se nuk ka ndërmend të ndjekë rrugën ligjore apo të ngrejë kallëzim penal kundër rivalit nga Dagestani dhe grupit të tij. Ngjarja e dhunshme u regjistrua brenda ambienteve të një hoteli në Abu Dhabi, ku Dvalishvili po qëndronte për shkak të angazhimeve të tij lidhur me ngjarjen e ardhshme promovuese të organizatës RAF në mundje. Gjatë kohës që ai po realizonte xhirimet për spotin promovues, në vendngjarje mbërriti Nurmagomedov i shoqëruar nga anëtarët e skuadrës së tij. Tensioni shpërtheu kur Nurmagomedov dhe njerëzit e tij iu afruan sportistit gjeorgjian, ku ish-kampioni i peshave të lehta e goditi me shuplakë Dvalishvilin. Ky gjest provokues solli një përplasje fizike masive, gjatë së cilës luftëtari i njohur me nofkën “The Machine” dhe shoku i tij i skuadrës u gjendën në inferioritet numerik. Menjëherë pas ngjarjes, Dvalishvili bëri publike pamjet filmike të sherrit duke e dënuar ashpër sjelljen e Nurmagomedov, ndërkohë që policia lokale ndërhyri duke vënë në pranga të gjithë personat e përfshirë në konflikt. Gjatë ditës së premte u zyrtarizua vendimi i autoriteteve, të cilat gjobitën Usman Nurmagomedov dhe bashkëpjesëmarrësit e tij, duke i dënuar gjithashtu me gjashtë muaj heqje lirie. Edhe Dvalishvili u ndëshkua me gjobë për shkak të përfshirjes në përleshje, por iu shmang dënimit me burg pasi hetimet vërtetuan se ai kishte reaguar vetëm për vetëmbrojtje. Po ashtu, organet kompetente ngritën akuza edhe ndaj një prej anëtarëve të ekipit të Nurmagomedov, i cili u identifikua si personi që ka regjistruar incidentin me kamera. Tashmë që gjakrat janë qetësuar, Dvalishvili ka përdorur profilin e tij zyrtar në rrjetin social X për të shprehur mirënjohjen ndaj mbështetësve të tij dhe banorëve vendas në Abu Dhabi. “Dua vetëm t’u bëj të ditur të gjithëve se jam liruar, se jam mirë, i shëndetshëm dhe gati të ec përpara. Dua t’i falënderoj të gjithë në Abu Dhabi për ndihmën e tyre në zgjidhjen e kësaj situate. Më pëlqen të vij në Abu Dhabi dhe jam i lumtur që gjithmonë më presin mirë këtu”, u shpreh sportisti, duke shtuar më tej: “Shpresoj vërtet që t’i lirojnë të gjithë të tjerët – nuk do të ngre padi. Uroj paqe dhe më të mirën për të gjithë. Faleminderit të gjithëve për dashurinë dhe mbështetjen tuaj”.