Operacion blic në Mitrovicën e Jugut: Goditet rrjeti i bixhozit të paligjshëm, kapen armë dhe para

Policia e Kosovës ka ndërmarrë një aksion të gjerë në gjashtë pika të ndryshme të Mitrovicës së Jugut, mbi dyshimet e bazuara për veprimtari të paligjshme të organizimit dhe zhvillimit të lojërave të fatit. Bazuar në njoftimin zyrtar të autoriteteve të rendit, kontrollet intensive janë shtrirë në pronat e tre personave, të cilët tashmë kanë rënë në pranga. Gjatë këtij operacioni bastisjeje, njësitet policore kanë sekuestruar një sërë provash materiale, ku përfshihen nëntë aparatura telefonike, pajisje të ndryshme elektronike, njësi regjistrimi kamerash DVR, si dhe një shumë prej 6,844.80 eurosh para të gatshme. Po ashtu, gjatë kontrollit në terren, efektivët kanë arritur të gjejnë dhe të konfiskojnë një armë zjarri pistoletë, dhjetë fishekë të kalibrave të ndryshëm, një automjet, një sasi lënde të dyshuar narkotike prej rreth 10 gramësh të vendosur në një kavanoz, katër mjetë bluarëse për narkotikë, si dhe një cigare të mbushur me substancë të dyshuar. Inventari i provave të sekuestruara përfshin gjithashtu një valixhe me pajisje dedikuar lojërave të fatit, duke përfshirë çipa dhe letra bixhozi, nëntë kartela bankare, njëzet e një dokumente të ndryshme dhe një sprej OC. Të tre të dyshuarit janë shoqëruar në stacionin policor dhe, me urdhër të prokurorit të rastit, ndaj tyre është caktuar masa e ndalimit dhe dërgimi në mbajtje.