SHBA ndaloi fluturimet në gjithë vendin për 5 orë – zbulohet shkaku

Shtetet e Bashkuara të Amerikës kanë përjetuar një ndërprerje të jashtëzakonshme të trafikut ajror, duke prekur mijëra fluturime dhe mbi 1 milion pasagjerë. Administrata Federale e Aviacionit (FAA) urdhëroi të premten ndalimin e ngritjes së shumicës së aeroplanëve në të gjithë vendin, për shkak të problemeve në sistemet e komunikimit dhe radarëve të kontrollit ajror, raporton Associated Press (AP). Ndalimi zgjati rreth 5 orë dhe u hoq gjatë mbrëmjes, por autoritetet paralajmëruan se normalizimi i plotë i trafikut ajror mund të marrë disa ditë. Sipas zyrtarëve amerikanë, problemet u shkaktuan nga mbingarkesa e pajisjeve të vjetra gjatë instalimit të teknologjisë së re në sistemin e kontrollit të trafikut ajror. Sekretari amerikan i Sigurisë Kombëtare, Markwayne Mullin, deklaroi se nuk kishte indikacione për ndonjë sulm kibernetik, ndërsa hetimet për shkakun e plotë të ndërprerjes po vazhdojnë. Të dhënat e kompanisë së analizave të aviacionit Cirium tregojnë se të paktën 827 fluturime u devijuan, prej të cilave 670 u kthyen në aeroportet e nisjes, ndërsa 157 u drejtuan në aeroporte të tjera. Në kohën kur u vendos ndalimi, mbi 3,500 aeroplanë ndodheshin në hapësirën ajrore amerikane. Ndërkohë, rreth 11,000 fluturime, me mbi 1.5 milion pasagjerë, ishin planifikuar të niseshin nga aeroportet amerikane pas orës 16:00, sipas kohës lokale të pjesës lindore të SHBA-së. Sekretari amerikan i Transportit, Sean Duffy, tha se sistemet u rifilluan pas identifikimit të problemeve, por nuk përjashtoi mundësinë e ndërprerjeve të tjera. Ai theksoi nevojën për investime shtesë në modernizimin e infrastrukturës së kontrollit ajror, duke kërkuar edhe 30 miliardë dollarë për përfundimin e këtij procesi. Sipas AP-së, kjo ishte ndërprerja më e gjatë e fluturimeve në shkallë kombëtare në SHBA gjatë 25 viteve të fundit. Ndalimi i mëparshëm në nivel kombëtar kishte ndodhur në janar të vitit 2023, pas një defekti në një sistem kompjuterik të FAA-së. Pavarësisht rifillimit të fluturimeve, kompanitë ajrore pritet të përballen me vonesa dhe anulime, pasi shumë aeroplanë dhe ekuipazhe kanë mbetur jashtë pozicioneve të planifikuara.