Enver Hoxhaj në Kurdistan: Agjendë e ngjeshur takimesh me diplomatë dhe ministra të huaj

Ish-ministri i Jashtëm i Kosovës, Enver Hoxhaj, po zhvillon një vizitë në Sulaymaniyah të Kurdistanit, ku po merr pjesë në Forumin Strategjik të Slemanit (Slemani Strategic Forum). Ai është pjesë e këtij organizimi me ftesë të posaçme nga zëvendëskryeministri i Qeverisë Rajonale të Kurdistanit, Qubad Talabani. Gjatë qëndrimit në këtë rajon, Hoxhaj ka zhvilluar një sërë takimesh të rëndësishme, duke përfshirë një takim me guvernatorin e Slemanit, Dr. Haval Abubaker. Përmes një njoftimi në rrjetet sociale, deputeti i PDK-së shprehu mirënjohjen për mikpritjen e ngrohtë dhe theksoi rëndësinë e këtij forumi si një platformë për shkëmbimin e përvojave shtetndërtuese të Kosovës me përfaqësues të rajoneve të ndryshme të botës. Diskutimet e Hoxhajt kanë tejkaluar kornizat e paneleve zyrtare, duke u shtrirë edhe në takime dypalëshe me ministra të Qeverisë Rajonale të Kurdistanit, të cilët mbulojnë resorët e mbrojtjes, infrastrukturës dhe punës. Këto takime synojnë forcimin e bashkëpunimit dhe shkëmbimin e praktikave më të mira në këto fusha. Agjenda e diplomatit kosovar ka qenë mjaft dinamike, ku ai ka pasur mundësinë të bashkëbisedojë me figura të shquara ndërkombëtare, si ish-zëvendëspresidenti ekzekutiv i Komisionit Evropian, Frans Timmermans, dhe ish-komisioneri evropian, Dimitris Avramopoulos. Gjithashtu, ai ka zhvilluar takime me ish-ministrin britanik për Investime, Lord Grimstone of Boscobel, si dhe me Hryhoriy Nemyria, ish-zëvendëskryeministër i Ukrainës. Duke reflektuar mbi këto takime, Hoxhaj e ka cilësuar Kosovën si një model suksesi në procesin e shtetndërtimit dhe një shembull për vendet e vogla që aspirojnë fuqizimin e pozicionit të tyre në arenën ndërkombëtare. Ai nënvizoi se diplomacia e Kosovës duhet të jetë aktive dhe e pranishme në të gjitha qendrat ku zhvillohen debatet globale. Kujtojmë se në ditën e parë të këtij forumi, Hoxhaj pati takime edhe me ish-kryeministrin bullgar, Kiril Petkov, si dhe me figurën e njohur të politikës turke, ish-zëvendëskryeministrin dhe kryediplomatin Ali Babacan.