Kosova forcon sigurinë ndaj fatkeqësive natyrore përmes partneritetit me OKB-në

Ministrja e Mjedisit dhe Planifikimit Hapësinor, Fitore Pacolli, ka konfirmuar se Kosova do të bëhet pjesë e nismave rajonale që synojnë minimizimin e pasojave nga fatkeqësitë natyrore, duke vënë theksin te rritja e qëndrueshmërisë së qendrave urbane dhe sektorit të biznesit. Ky angazhim erdhi pas takimit që ministrja Pacolli zhvilloi me përfaqësues të Zyrës së Kombeve të Bashkuara për Reduktimin e Rrezikut nga Fatkeqësitë (UNDRR), në kuadër të zhvillimeve të Konferencës së OKB-së për Ndryshimet Klimatike (COP31). Diskutimet u fokusuan në përfshirjen e vendit tonë në projekte të përbashkëta rajonale, me qëllim krijimin e mekanizmave më efikasë për mbrojtjen e qyteteve dhe bizneseve nga rreziqet natyrore. Një vëmendje e shtuar iu kushtua mbështetjes për ndërmarrjet e vogla dhe të mesme, të cilat janë më të ekspozuara ndaj pasojave të këtyre fenomeneve. Në kuadër të këtij bashkëpunimi, palët shqyrtuan edhe mundësitë e shkëmbimit të praktikave më të mira me qytete të ndryshme evropiane që kanë shënuar progres të dukshëm në menaxhimin e rreziqeve të tilla. “Kosova do të jetë pjesë e komponentit rajonal të projektit, ndërsa synojmë të forcojmë bashkëpunimin dhe mekanizmat e koordinimit për t’u përgatitur më mirë ndaj fatkeqësive natyrore”, ka deklaruar Pacolli.