Haxhiu: Barazia për personat me aftësi të kufizuara duhet të jetë realitet në arsim dhe punësim

Kryetarja e Kuvendit të Kosovës, Albulena Haxhiu, zhvilloi një takim me përfaqësuesit e organizatës “Handicap Students of Kosova”, ku në fokus të diskutimit ishin të drejtat themelore dhe vështirësitë me të cilat përballen personat me aftësi të kufizuara në shoqërinë tonë. Palët shkëmbyen mendime lidhur me sfidat komplekse që kjo kategori has në përditshmëri, me theks të veçantë te pengesat në qasjen e arsimimit cilësor, shërbimet institucionale dhe mundësitë për tregun e punës. Në këtë takim u vlerësua roli kyç i legjislativit në mbikëqyrjen e zbatimit të ligjeve në fuqi, duke nënvizuar domosdoshmërinë e një bashkëpunimi më intensiv ndërmjet institucioneve shtetërore dhe shoqërisë civile për të adresuar këto problematika. Duke e rikonfirmuar përkushtimin për këtë çështje, Haxhiu potencoi se barazia nuk duhet të mbetet vetëm një parim deklarativ, por duhet të përkthehet në mundësi konkrete për studime, punësim dhe një pjesëmarrje sa më aktive në të gjitha sferat e jetës publike.