Hoti hedh poshtë pretendimet për heqjen e statusit të dëshmorit për personalitetet historike

Ministri për Punë, Familje dhe Vlerat e Luftës Çlirimtare, Andin Hoti, ka reaguar zyrtarisht lidhur me thashethemet se institucionet qeveritare kanë marrë vendim për t'ua hequr statusin e dëshmorit figurave të shquara si Ahmet Krasniqi, Fehmi Agani, Enver Maloku, Bajram Kelmendi dhe personaliteteve të tjera. Në deklaratën e tij, ministri Hoti ka demantuar kategorikisht këto pretendime, duke sqaruar se asnjë vendim i kësaj natyre nuk është marrë nga ana e Ministrisë apo e Qeverisë së Kosovës. “Komisioni Qeveritar për Njohjen dhe Verifikimin e Statusit e ka përfunduar mandatin e tij shumë vite më parë dhe aktualisht nuk është një mekanizëm funksional. Personat e lartpërmendur gëzojnë statusin e dëshmorit dhe të gjitha të drejtat pensionale që u takojnë konform legjislacionit në fuqi. Asnjëri prej tyre nuk është privuar nga statusi apo nga përfitimet pensionale”, ka theksuar Hoti. Në fund të reagimit të tij, ministri Hoti ka shprehur kritika të ashpra ndaj krijimit dhe përhapjes së këtyre dezinformatave, duke i cilësuar ato si të pavërteta që synojnë krijimin e konfuzionit në opinionin publik.