Detaje tronditëse të vrasjes në Baicë: Top Kolshi akuzohet për ekzekutimin mizor dhe fshehjen e trupit të Enver Bajraktarit

Prokuroria Themelore në Prishtinë, përkatësisht Departamenti për Krime të Rënda, ka finalizuar aktakuzën ndaj të pandehurit Top Kolshi. Ai akuzohet për dy vepra penale të rënda: “Vrasje e rëndë” dhe “Mbajtja në pronësi, kontroll ose posedim të paautorizuar të armëve”. Ngjarja makabër, e cila tronditi opinionin publik, është shënuar më 3 gusht 2025 në fshatin Baicë të Lipjanit. Sipas dosjes së prokurorisë, konflikti mes të akuzuarit dhe viktimës, Enver Bajraktari, ka degraduar në një krim të rëndë pas një mosmarrëveshjeje të mëhershme. Në dokumentin e akuzës përshkruhet një skenar mizor i vrasjes. Dyshohet se Kolshi e ka goditur fillimisht viktimën me një mjet të fortë në zona të ndryshme të trupit, për ta vazhduar më pas aktin fatal duke e shtrënguar me litar në qafë, gjë që ka shkaktuar vdekjen e Bajraktarit si pasojë e asfiksisë mekanike. Pas kryerjes së krimit, i pandehuri dyshohet se është përpjekur të zhdukë gjurmët. Ai akuzohet se e ka tërhequr zvarrë trupin e pajetë deri në një gropë, të cilën e ka mbuluar me dhe, ndërsa mjetet e përdorura për krimin i ka fshehur për t'iu shmangur drejtësisë. Gjatë bastisjes së banesës së të akuzuarit në Baicë, organet e rendit kanë gjetur dhe konfiskuar një arsenal të armëve, duke përfshirë pushkë, armë automatike dhe municion të ndryshëm, për të cilat Kolshi nuk posedonte leje valide. Prokurori i çështjes, pas shqyrtimit të provave, i ka kërkuar gjykatës që pas procedurave të nevojshme gjyqësore, i pandehuri të shpallet fajtor dhe të marrë dënimin maksimal sipas dispozitave ligjore në fuqi.