Kujdes tifozë: Rregullat e rrepta dhe masat e sigurisë për duelin Kosovë – Izrael

Federata e Futbollit e Kosovës (FFK) ka bërë publike udhëzimet dhe protokollet e sigurisë që do të jenë në fuqi për ndeshjen e nesërme ndërmjet Kosovës dhe Izraelit, e cila zhvillohet në stadiumin “Fadil Vokrri”. Sipas njoftimit zyrtar, është rreptësisht e ndaluar hyrja në impiantin sportiv me mjete të mprehta, armë të çfarëdo lloji, si dhe mjete piroteknike, përfshirë fishekzjarrët, flakadanët apo lëndë të tjera eksplozive. Gjithashtu, listës së gjësendeve të ndaluara i shtohen pijet alkoolike, dronët, rrezet lazer, pajisjet e zërimit që nuk kanë leje përkatëse, si dhe çdo lloj banderole që përmban mesazhe raciste, diskriminuese apo politike. Për arsye sigurie, tifozët nuk do të lejohen të hyjnë as me çadra apo objekte të tjera që mund të konsiderohen të rrezikshme për pjesëmarrësit e tjerë. Çdo vizitor është i obliguar që gjatë hyrjes në stadium të posedojë një dokument identifikimi të vlefshëm. Duke pasur parasysh kontrollet e imtësishme të sigurisë, FFK-ja këshillon tifozët që të paraqiten në stadium sa më herët, për të shmangur radhët e gjata dhe vonesat e mundshme. Në lidhje me infrastrukturën rrugore, federata ka njoftuar se operatori “Prishtina Parking” do të jetë jashtë funksionit gjatë ditës së ndeshjes. Për këtë arsye, tifozët udhëzohen që të gjejnë vende parkimi në zona më të largëta, në mënyrë që të menaxhojnë më mirë qarkullimin dhe të mos përballen me ngarkesë në trafik. Në fund, Federata e Futbollit të Kosovës ka shprehur falënderimet për tifozët për mirëkuptimin e treguar, duke u bërë thirrje atyre që ta mbështesin ekipin kombëtar në një atmosferë sportive, me disiplinë dhe respekt maksimal.